മുക്കൂട്ടുതറ തിരുവമ്പാടി ക്ഷേത്രത്തിൽ ഭാഗവത സപ്താഹം

എരുമേലി ∙ മുക്കൂട്ടുതറ തിരുവമ്പാടി ശ്രീകൃഷ്ണ ക്ഷേത്രത്തിലെ ഭാഗവത സപ്താഹ യജ്ഞം ഇന്നു മുതൽ 18 വരെ നടക്കും. ഇല്ലത്തപ്പൻകാവ് ജനാർദനൻ നമ്പൂതിരിയാണു യജ്ഞാചാര്യൻ. ഇന്ന് വൈകിട്ട് 4.30 ന് നടക്കുന്ന യജ്ഞാരംഭ സഭയിൽ ക്ഷേത്രം മേൽശാന്തി പ്രശാന്ത് കെ. നമ്പൂതിരി ഭദ്രദീപം കൊളുത്തും. പ്രസിഡന്റ് കെ.കെ. മോഹനൻ നായർ അധ്യക്ഷത വഹിക്കും. ഒ.എസ്. സതീഷ് തൃശിവപേരൂർ മുഖ്യപ്രഭാഷണം നടത്തും. സിനിമാ താരം അദ്വൈത് സാജുവിനെയും ഉന്നത വിജയം നേടിയവരെയും ആദരിക്കും. തുടർന്ന് ഭാഗവത മാഹാത്മ്യപ്രഭാഷണം നടക്കും.

യജ്ഞ ദിവസങ്ങളിൽ രാവിലെ ഭാഗവത പാരായണം, 10ന് വിശേഷാൽ പൂജകൾ, 11.45 മുതൽ പ്രഭാഷണം, ഒന്നിന് പ്രസാദമൂട്ട്, 2.15 മുതൽ പാരായണം എന്നിവ നടക്കും. 14 ന് രാവിലെ 10 ന് നവഗ്രഹ പൂജ, ശ്രീകൃഷ്ണ അവതാരം. 6.30 ന് ബാലഗോപാല പൂജ (ഉണ്ണിയൂട്ട്) നടക്കും. 15ന് 10ന് മൃത്യുഞ്ജയ ഹോമം,11 ന് ഗോവർധന പൂജ, വൈകിട്ട് 6.30 ന് വിദ്യാരാജഗോപാല മന്ത്രാർച്ചന. 16 ന് 11ന് രുക്മിണി സ്വയംവര ഘോഷയാത്ര. 11.30 ന് രുക്മിണി സ്വയംവരം. 18 ന് 6 ന് ഭാഗവത സംക്ഷിപ്തം. 10 ന് ഭാഗവത സമർപ്പണം.