ഫിലാറ്റലി പുൽക്കൂട് ഒരുക്കി എ.കെ.ജെ.എം. സ്കൂൾ

കാഞ്ഞിരപ്പള്ളി എ.കെ.ജെ.എം. സ്കൂളിൽ ഈ വർഷത്തെ ക്രിസ്മസ് ആഘോഷം വളരെ വർണാഭമായി നടന്നു. ഓരോ വർഷവും പുതുമയാർന്ന ആശയവുമായി പുൽക്കൂട് ഒരുക്കുന്ന ഫാ വിൽസൺ പുതുശ്ശേരി എസ്.ജെ.യാണ് ഈ വർഷവും പുൽക്കൂട് ഒരുക്കുന്നതിന് നേതൃത്വം നൽകിയത്. ക്രിസ്മസുമായി ബന്ധപ്പെട്ട നിരവധി സ്റ്റാമ്പുകൾ മാത്രം ഉപയോ​ഗിച്ചാണ് ഈ വർഷം അദ്ദേഹം ക്രിബ് ഒരുക്കിയത്. യൂണിവേഴ്സൽ പോസ്റ്റൽ യൂണിയന്റെ 150 ാം വർഷം ആഘോഷിക്കുന്ന ഈ വർഷം ഭൂരിഭാ​​ഗവും സ്വിറ്റ്സർലണ്ടിലെ സ്റ്റാമ്പുകളാണ് ഇതിനുവേണ്ടി ഉപയോ​ഗിച്ചത്. യൂണിയന്റെ ആസ്ഥാനം സ്വിറ്റ്സർലണ്ടിലെ ബേൺ ആണ്. കഴിഞ്ഞ വർഷം ഉപയോ​ഗശൂന്യമായ പേനകൾ ഉപയാ​ഗിച്ചായിരുന്നു പുൽക്കൂട് ഒരുക്കിയത്.

കാഞ്ഞിരപ്പള്ളി പോസ്റ്റൽ ഡിവിഷൻ അസിസ്റ്റന്റ് സൂപ്പണ്ടന്റ് മാത്യു ജേക്കബ് പുൽക്കൂടിന്റെ പ്രദർശനോദ്ഘാടനം നിർവ്വഹിച്ചു. ഫിലാറ്റലി സൊസൈറ്റി കോട്ടയം പ്രസിഡന്റ് ജോസഫ് കയ്യാലയ്ക്കൽ, സ്കൂൾ മാനേജർ ഫാ സ്റ്റീഫൻ ചുണ്ടംതടം എസ്.ജെ., പ്രിൻസിപ്പാൾ ഫാ അ​ഗസ്റ്റിൻ പീടികമല എസ്.ജെ. എന്നിവർ ക്രിസ്മസ് സന്ദേശങ്ങൾ നൽകി.

വാദ്യമേളങ്ങളുടെയും ​ഗാനങ്ങളുടെയും അകമ്പടിയോടെ എത്തിയ നിരവധി ക്രിസ്മസ് പപ്പാമാരൊടൊപ്പം കുട്ടികൾ ക്രിസ്മസിനെ വരവേറ്റു. തുടർന്ന് എൽ.പി., യു.പി., എച്ച്.എസ്., എച്ച്.എസ്.എസ്. എന്നീ വിഭാ​ഗങ്ങളുടെ കരോൾ ​ഗാന മത്സരവും ഉണ്ടായിരുന്നു. ക്രിസ്മസ് ​ഗാനങ്ങൾക്കൊപ്പം കുട്ടികൾ നൃത്തച്ചുവടുകൾ വച്ചു.