കാഞ്ഞിരപ്പള്ളി ന്യൂസ് – ഇന്നത്തെ പത്രം date :13/06/2025
കാഞ്ഞിരപ്പള്ളി താലൂക്കിലെ ഏറ്റവും പുതിയ വാർത്തകൾ, വിശേഷങ്ങൾ, ഫോട്ടോകൾ, അറിയിപ്പുകൾ, തൊഴിൽ വാർത്തകൾ, ചരമ വാർത്തകൾ, ഇന്നത്തെ പരിപാടി, പരാതികൾ ഉൾപ്പെടെ നമ്മുടെ നാട്ടിലെ സമഗ്രമായ വാർത്തകൾ ഒറ്റ ലിങ്കിൽ …
എരുമേലി ടൗണും പരിസരവും എൻ.സി.സി കേഡറ്റുകൾ ശുചീകരിച്ചു
എരുമേലി : സ്വച്ച് ഭാരത് അഭിയാന്റെയും പുനീത് സാഗർ അഭിയാന്റെയും ഭാഗമായി സിക്സ്റ്റീൻ കേരള എൻ .സി.സി ബറ്റാലിയൻ കോട്ടയത്തിന്റെ ആഭിമുഖ്യത്തിൽ എരുമേലി ടൗണും പരിസരവും ശുചീകരിച്ചു. എരുമേലി വലിയമ്പലം, കെ.എസ്.ആർ.ടി.സി. ബസ് സ്റ്റാൻഡ് , പ്രൈവറ്റ് ബസ് സ്റ്റാൻഡ് എന്നിവിടങ്ങളിൽ നടന്ന ശുചീകരണത്തിൽ നൂറോളം കേഡറ്റുകൾ പങ്കെടുത്തു.
ക്യാമ്പ് കമാൻഡന്റ് കേണൽ പി. ശ്രീനിവാസൻ നേതൃത്വം നൽകി. എരുമേലി ഗ്രാമപഞ്ചായത്ത് പ്രസിഡന്റ് സുബി സണ്ണി, പഞ്ചായത്ത് സ്റ്റാൻഡിങ് കമ്മിറ്റി ചെയർപേഴ്സൺ ലിസി സജി , എം.ഇ.എസ് കോളേജ് സെക്രട്ടറി സി. യു. അബ്ദുൽ കരീം, കോളേജ് പ്രിൻസിപ്പൽ പ്രൊഫ. ഡോ. അനിൽകുമാർ എസ്. തുടങ്ങിയവർ പ്രസംഗിച്ചു .
മികച്ച യുവ പൗരന്മാരെ വാർത്തെടുക്കുന്നതിനും രാജ്യസേവനത്തിന് അവരെ പ്രാപ്തരാക്കുന്നതിനുമുള്ള മഹത്തായ ലക്ഷ്യവുമായി, എരുമേലി എം.ഇ.എസ് കോളേജിൽ പത്ത് ദിവസം നീണ്ടുനിൽക്കുന്ന സംയുക്ത വാർഷിക പരിശീലന ക്യാമ്പിന് ഏഴിനാണ് തുടക്കം കുറിച്ചത്. അസോസിയേറ്റ് എൻ.സി.സി. ഓഫീസർമാരായ സാബ്ജാൻ യൂസഫ്, ജെയ്മോൻ, രാജീവ് ജോസഫ്, ഗോപകുമാർ, ഫിൽമോൻ,സോണി തോമസ്, സുബേദാർ മേജർ സുനിൽ കുമാർ, സുബേദാർ ശ്രീകുമാർ എന്നിവരുടെ മേൽനോട്ടത്തിൽ, കേഡറ്റുകൾക്ക് സൈനിക ചരിത്രം, റൈഫിൾ ഉപയോഗിച്ചുള്ള ആയുധ പരിശീലനം, ഫയറിംഗ്, ട്രാഫിക് നിയമങ്ങൾ, പൗരന്റെ ഉത്തരവാദിത്തങ്ങൾ തുടങ്ങിയ വിഷയങ്ങളിൽ വിപുലമായ പരിശീലനം നൽകി വരുന്നു.
ഈ ക്യാമ്പിന്റെ ഭാഗമായി, കോട്ടയം എൻ.സി.സി. ഗ്രൂപ്പിന്റെ കീഴിലുള്ള വിവിധ ബറ്റാലിയനുകളിൽ നിന്ന് 2027ലെ റിപ്പബ്ലിക് ദിന പരേഡിൽ പങ്കെടുക്കേണ്ട കേഡറ്റുകളെ തിരഞ്ഞെടുക്കുന്നതിനുള്ള സെലക്ഷൻ പരേഡും നടന്നു വരുന്നു. ഇത് കേഡറ്റുകൾക്ക് അവരുടെ കഴിവുകൾ പ്രകടിപ്പിക്കാനും ദേശീയതലത്തിൽ രാജ്യത്തെ പ്രതിനിധീകരിക്കാനുമുള്ള ഒരു അസുലഭ അവസരമാണ്.16-ന് ഈ സംയുക്ത വാർഷിക പരിശീലന ക്യാമ്പ് സമാപിക്കും.
ലഹരിക്കെതിരെ എരുമേലിയിൽ തെരുവ് നാടകം നടത്തി എംഇഎസ് കോളേജ് വിദ്യാർത്ഥികൾ.
എരുമേലി : എംഇഎസ് യൂത്ത് വിങ് ജില്ല കമ്മറ്റിയുടെ ലഹരി വിരുദ്ധ ബോധവത്ക്കരണ ക്യാമ്പയിനായ “ചുവട്” ഭാഗമായി എരുമേലി എംഇഎസ് കോളേജിലെ സോഷ്യൽ വർക്ക് വിഭാഗം വിദ്യാർത്ഥികൾ തെരുവുനാടകത്തിലൂടെ എരുമേലി കവലയിൽ ബോധവത്ക്കരണ സന്ദേശം നൽകി.
കോട്ടയം ജില്ലയിലെ വിവിധ താലൂക്കുകളിലായി നടത്തിയ ബോധവൽക്കരണ ക്യാമ്പയിന്റെ സമാപന സമ്മേളനത്തിൽ
യൂത്ത് വിങ് ജില്ലാ പ്രസിഡന്റ് ഷെഹിം വിലങ്ങുപാറ അധ്യക്ഷത വഹിച്ചു. എരുമേലി ഗ്രാമപഞ്ചായത്ത് പ്രസിഡന്റ് മറിയാമ്മ സണ്ണി ഉദ്ഘാടനം നിർവ്വഹിച്ചു. ഒരു വർഷം നീണ്ട് നിൽക്കുന്ന ലഹരിവിരുദ്ധ ക്യാമ്പയിന്റെ ലോഗോ യൂത്ത് വിങ്ങ് കാഞ്ഞിരപ്പള്ളി താലൂക്ക് പ്രസിഡന്റ് അർഷാദ് നജീബിന് കൈമാറി പ്രകാശനം ചെയ്തു.
യോഗത്തിൽ എംഇഎസ് ജില്ലാ കമ്മറ്റി അംഗങ്ങളായ നാസർ പാദുക,വി ടി അയൂബ്ഖാൻ, കോളേജ് പ്രിൻസിപ്പൽ ഡോ. അനിൽ കുമാർ, സോഷ്യൽ വർക്ക് വിഭാഗം മേധാവി മുഹമ്മദ് ഷിഫാസ് എന്നിവർ ബോധവത്ക്കരണ സന്ദേശം നൽകി. യൂത്ത് വിങ് സംസ്ഥാന കമ്മിറ്റി അംഗം അസർ കറുകാഞ്ചേരിയിൽ, നൈനാർ ജുമാമസ്ജിദ് വൈസ് പ്രസിഡന്റ് സലിം കണ്ണങ്കര, അൻവർഷ, ഷഫീക്ക് മണങ്ങലൂർ, സോഷ്യൽ വർക്ക് വിഭാഗം അദ്ധ്യാപിക സഹേബ എന്നിവർ സംസാരിച്ചു.
നൈനാർ പള്ളി സെൻട്രൽ സെൻട്രൽ ജമാ അത്തിന്റെ നേതൃത്വത്തിൽ ഉന്നത വിജയികളെ ആദരിച്ചു
കാഞ്ഞിരപ്പള്ളി : കാഞ്ഞിരപ്പള്ളി നൈനാർ പള്ളി സെൻട്രൽ സെൻട്രൽ ജമാ അത്തിന്റെ നേതൃത്വത്തിൽ വിവിധ പരീക്ഷകളിൽ വിജയിച്ച ഉന്നത വിജയികളെ ആദരിക്കലും പഠനോപകരണ വിതരണവും പളളി ഹാളിൽ നടന്നു. ഐ എ എസ് പരീക്ഷയിൽ വിജയിച്ച നെസറിൻ പി. ഫസീമിന് മെമൻറ്റോയും ക്യാഷ് അവാർഡും നൽകികൊണ്ട് അഡ്വ: സെബാസ്റ്റൻ കുളത്തുങ്കൽ എം എൽ എ യോഗം ഉദ്ഘാടനം ചെയ്തു.
ജമാഅത്ത് പ്രസിഡണ്ട് ഹാജി പി എം അബ്ദുൽ സലാം പാറയ്ക്കൽ അധ്യക്ഷനായി. നൈനാർ പളളി ചീഫ് ഇമാം എ പി ഷിഫാർ മൗലവി അനുഗ്രഹ പ്രഭാഷണം നടത്തി. ജമാ അത്ത് സെക്രട്ടറി പി പി അൻസാരി വാവേർ , ഷിബിലി കറൻറ്റ്സ്, പി എച്ച് ഷാജഹാൻ , കെ എച്ച് റിയാസ്, ഷമീർ കൊല്ലക്കാൻ , സി എസ് ഇല്ലിയാസ്, പി ഇ അബ്ദുൽ സലാം, അൻഫാൻ എന്നിവർ സംസാരിച്ചു.
ഓട്ടോഡ്രൈവറുടെ വൃക്കമാറ്റിവെയ്ക്കൽ ശസ്ത്രക്രിയക്കായി സമാഹരിച്ച ചികിത്സാസഹായനിധി കൈമാറി
പൊൻകുന്നം: ഓട്ടോഡ്രൈവറായ ചിറക്കടവ് 19-ാം വാർഡ് കുന്നുംപുറത്ത് ബിനുവിന്റെ വൃക്കമാറ്റിവെയ്ക്കൽ ശസ്ത്രക്രിയക്കായി സമാഹരിച്ച തുക കൈമാറി. ജനപ്രതിനിധികളും സാമൂഹികസംഘടനകളും പൊതുപ്രവർത്തകരും ചേർന്നുള്ള ചികിത്സാസഹായസമിതി 12.79 ലക്ഷം രൂപയാണ് സമാഹരിച്ചത്.
സഹായസമിതി ചെയർമാൻ ബി.രവീന്ദ്രൻ നായർ അധ്യക്ഷത വഹിച്ചു. പഞ്ചായത്ത് പ്രസിഡന്റ് അഡ്വ.സി.ആർ.ശ്രീകുമാർ തുക കൈമാറി. വാർഡംഗം ഷാക്കി സജീവ്, സമിതി ഖജാൻജി കെ.കെ.സുരേഷ്കുമാർ , എം.പി.രാഗേഷ്, ടോമി ഡൊമിനിക്ക്, പഞ്ചായത്തംഗങ്ങൾ , രാഷ്ട്രീയകക്ഷി പ്രതിനിധികൾ, വിവിധ സംഘടനാഭാരവാഹികൾ തുടങ്ങിയവർ പങ്കെടുത്തു.
വ്യാപാരസമുച്ചയത്തിന്റെ ശിലാസ്ഥാപനം നടത്തി
പൊൻകുന്നം: മുഹിയിദീൻ ജുമാമസ്ജിദ് നിർമിക്കുന്ന വ്യാപാരസമുച്ചയത്തിന്റെ ശിലാസ്ഥാപനം ഗവ.ചീഫ് വിപ്പ് ഡോ.എൻ.ജയരാജ് നിർവഹിച്ചു . സമ്മേളനം ആന്റോ ആന്റണി എംപി ഉദ്ഘാടനം ചെയ്തു. ജമാഅത്ത് പ്രസിഡന്റ് അനൂപ്ഖാൻ കല്ലംപറമ്പിൽ അധ്യക്ഷത വഹിച്ചു. ചീഫ് ഇമാം അബ്ദുൽ ഹാദി മുഖ്യപ്രഭാഷണം നടത്തി. ചിറക്കടവ് പഞ്ചായത്ത് പ്രസിഡന്റ് അഡ്വ.സി.ആർ.ശ്രീകുമാർ, വാർഡംഗം ഷാക്കി സജീവ്, പി.എസ്.അബ്ദുൾ മജീദ് തുടങ്ങിയവർ സംസാരിച്ചു.
ക്ഷേത്ര കള്ളൻ ശരവണപാണ്ഡ്യൻ പിടിയിൽ; ആരാധാനാലയങ്ങൾ കേന്ദ്രീകരിച്ച് മോഷണം നടത്തുന്ന അന്തർ സംസ്ഥാന മോഷ്ടാവിനെ അറസ്റ്റ് ചെയ്തു; പെരുവന്താനം സുബ്രഹ്മണ്യസ്വാമി ക്ഷേത്രത്തിലും, മുക്കൂട്ടുതറ തിരുവമ്പാടി ശ്രീകൃഷ്ണ സ്വാമി ക്ഷേത്രത്തിലും മോഷണം നടത്തിയ പ്രതിയാണ് പിടിയിലായത് .
മുണ്ടക്കയം : മെയ് 29ന് രാത്രി പെരുവന്താനം ബോയ്സ് സുബ്രഹ്മണ്യസ്വാമി ക്ഷേത്രത്തിൽ നിന്നും ശ്രീകോവിൽ കുത്തിത്തുടർന്ന് വിഗ്രഹത്തിൽ ചാർത്തിയിരുന്ന 10000 രൂപാ വില വരുന്ന ഒരു ഗ്രാം സ്വർണ താലിയും, കാണിക്കവഞ്ചികൾ കുത്തിത്തുറന്ന് നാണയങ്ങളും നോട്ടുകളും ഉൾപ്പെടെ 40000 രൂപയുടെ മുതലുകൾ അപഹരിച്ച തമിഴ്നാട് മധുര സ്വദേശിയായ ശരവണപാണ്ഡ്യൻ എന്ന് വിളിക്കുന്ന രാമകൃഷ്ണൻ (39) എന്ന പ്രതിയെ പെരുവന്താനം പോലീസ് തമിഴ്നാട്ടിലെ ഉത്തമപാളയത്തു നിന്നും അറസ്റ്റ് ചെയ്തു. മുക്കൂട്ടുതറ തിരുവമ്പാടി ശ്രീകൃഷ്ണ സ്വാമി ക്ഷേത്രത്തിൽ ഉൾപ്പെടെ വിവിധ ആരാധാനാലയങ്ങൾ കേന്ദ്രീകരിച്ച് മോഷണം നടത്തിവന്നിരുന്ന പ്രതിയാണ് പിടിയിലായിരിക്കുന്നത് .
ഇയാൾക്കെതിരെ 2009-ൽ കടകൾ കുത്തിപ്പൊളിച്ച് മോഷണം നടത്തിയതിന് മുണ്ടക്കയം, കാഞ്ഞിരപ്പള്ളി, പാലാ, പൊൻകുന്നം, പോലീസ് സ്റ്റേഷനുകളിൽ 14 കേസുകൾ നിലവിലുണ്ട്. 2019 പൊൻകുന്നം പോലീസ് സ്റ്റേഷൻ പരിധിയിൽ ക്ഷേത്രമോഷണം നടത്തിയതിന് ജയിൽ ശിക്ഷ അനുഭവിച്ചിട്ടുണ്ട്. തമിഴ്നാട് തഞ്ചാവൂർ തേനി ജില്ലകളിലായി 13 മോഷണ കേസുകളിലും ഇയാൾ പ്രതിയാണ്. 2025 മെയ് മാസം ഇടുക്കി ജില്ലയിലെ പാമ്പനാർ കോട്ടയം ജില്ലയിലെ രാമപുരം .ജൂൺ മാസം എരുമേലി മുക്കൂട്ടുതറ , ഈരാറ്റുപേട്ട തുടങ്ങിയ സ്ഥലങ്ങളിലെ ക്ഷേത്രങ്ങളിൽ മോഷണം നടത്തിയതായി കുറ്റസമ്മതം നടത്തിയിട്ടുണ്ട് .
പെരുവന്താനം പോലീസ് ഇൻസ്പെക്ടർ ത്രീദീപ് ചന്ദ്രന്റെ നേതൃത്വത്തിൽ സബ് ഇൻസ്പെക്ടർ സതീശൻ എം ആർ, സബ് ഇൻസ്പെക്ടർ സുബൈർ സിവിൽ പോലീസ് ഓഫീസർമാരായ സുനീഷ് നായർ, തോമസ് എന്നിവരെ ഉൾപ്പെടുത്തി അന്വേഷണസംഘം രൂപീകരിച്ച് നടത്തിയ ശ്രമകരമായ അന്വേഷണത്തിനൊടുവിലാണ് പ്രതിയെ തമിഴ്നാട്ടിലെ ഉത്തമ പാളയം എന്ന സ്ഥലത്ത് നിന്നും പിടികൂടിയത്.
ഹരിത ശോഭയിൽ കുന്നുംഭാഗത്ത് പുതിയ അംഗൻവാടി.. വാർഡ് മെമ്പർ ആന്റണി മാർട്ടിന് നന്ദി ..
കാഞ്ഞിരപ്പള്ളി / കുന്നുംഭാഗം :- അസാധ്യമെന്ന് ഏറെക്കുറെ കരുതിയ ഒരു അടിയന്തിര ജനകീയ ആവശ്യം യാഥാർഥ്യമാക്കിയതിന്റെ സന്തോഷത്തിലും ചാരിതാർഥ്യത്തിലുമാണ് ചിറക്കടവ് പഞ്ചായത്ത് വാർഡ് മെംമ്പർ ആന്റണി മാർട്ടിൻ.
കാഞ്ഞിരപ്പള്ളി ഗവൺമെന്റ് സ്കൂളിൽ സ്പോർട്സ് സ്കൂൾ അനുവദിച്ചപ്പോൾ ഇവിടെ പ്രവർത്തിച്ചിരുന്ന 117- നമ്പർ അംഗൻവാടിയുടെ ഭാവി അനിശ്ചിതത്വത്തിൽ ആയിരുന്നു. സ്പോർട്സ് സ്കൂളിന്റെ മാനദണ്ഡമനുസരിച്ച് അംഗൻവാടിക്ക് സ്കൂളിൽ പ്രവർത്തിക്കാൻ അനുമതിയില്ലാത്തതായിരുന്നു അതിന് കാരണം. ഇതോടെ അംഗൻവാടി ടീച്ചർ പ്രസീതയും കുട്ടികളും എങ്ങോട്ട് പോകണമെന്ന് ആശങ്കയിൽ ആയി. ഗർഭിണികളും കുഞ്ഞുങ്ങളും അടക്കം നിരവധി ആവശ്യങ്ങൾക്ക് ആളുകൾ ആദ്യം സമീപിക്കുന്ന വാർഡിലെ ഒരു സർക്കാർ സ്ഥാപനം ഇല്ലാതാകുന്നത് വാർഡ് മെമ്പർ ആന്റണി മാർട്ടിനെയും വിഷമ വൃത്തത്തിൽ ആക്കി. സ്ഥലം ലഭ്യമാക്കിയാൽ ഫണ്ട് അനുവദിക്കാമെന്ന് ഡോ. എൻ. ജയരാജ് എംഎൽഎ അറിയിച്ചുവെങ്കിലും സ്ഥലത്തിന് പൊന്നും വിലയുള്ള കുന്ന ഭാഗത്ത് സ്ഥലം ലഭ്യമാക്കുവാൻ പ്രയാസം നേരിട്ടു. അവസാനം കരിപ്പാപറമ്പിൽ സിസ്റ്റർ കൊച്ചു റാണിയെ 3 സെന്റ് സ്ഥലത്തിനായി സമീപിച്ചപ്പോൾ അഞ്ചു സെന്റ് സ്ഥലം ഗവൺമെന്റ് സ്കൂളിനടുത്ത് തന്നെ നൽകുകയായിരുന്നു. പരിസ്ഥിതി സൗഹൃദമായിരിക്കണം അംഗൻവാടിയുടെ നിർമ്മിതിയും പരിസരവും എന്ന നിബന്ധന മാത്രമാണ് സിസ്റ്റർ കൊച്ചു റാണി മുന്നോട്ടുവച്ചത്.
തുടർന്ന് ഡോക്ടർ എൻ ജയരാജ് എംഎൽഎ 20 ലക്ഷം രൂപ അംഗൻവാടിക്ക് ഫണ്ട് അനുവദിച്ചു. പരിസ്ഥിതി സൗഹൃദ അംഗൻവാടിക്ക് യോജിച്ച പ്ലാൻ ആർക്കിടെക് ശ്രീകാന്ത് പങ്കപാട്ട് വരച്ചു നൽകി. നഷ്ടമാകും എന്ന് കരുതിയ അംഗൻവാടിയുടെ ശിലാസ്ഥാപന ചടങ്ങ് നാട്ടുകാർ ആഘോഷമാക്കി മാറ്റി. അംഗൻവാടിക്ക് സ്ഥലവും ഫണ്ടും ലഭ്യമാക്കുവാൻ കഠിന പരിശ്രമം നടത്തിയ വാർഡ് മെമ്പർ ആന്റണി മാർട്ടിനെ യോഗം അഭിനന്ദിച്ചു.
അംഗൻവാടിയുടെ ശിലാസ്ഥാപനം ഡോക്ടർ എൻ ജയരാജ എംഎൽഎയും അംഗൻവാടിക്ക് സ്ഥലം നൽകിയ സിസ്റ്റർ കൊച്ചുറാണി കരിപ്പാപറമ്പിലും ചേർന്ന് നിർവഹിച്ചു. തുടർന്നു നടന്ന യോഗം എംഎൽഎ ഉദ്ഘാടനം ചെയ്തു. ഗ്രാമപഞ്ചായത്ത് പ്രസിഡണ്ട് അഡ്വക്കേറ്റ് സി ആർ ശ്രീകുമാർ അധ്യക്ഷത വഹിച്ചു. വൈസ് പ്രസിഡണ്ട് സതി സുരേന്ദ്രൻ അഡ്വക്കേറ്റ് സുമേഷ് ആൻഡ്രൂസ് ബ്ലോക്ക് മെമ്പർമാരായ ഷാജി പാമ്പൂരി, ബി രവീന്ദ്രൻ നായർ,അഭിലാഷ് ചന്ദ്രൻ ഗ്രാമപഞ്ചായത്ത് അംഗങ്ങളായ ശോഭന മുട്ടത്ത്,എംജി വിനോദ്, കെ എബ്രഹാം,അമ്പിളി ശിവദാസ്, ഷാക്കി സജീവ്,ശ്രീലത സന്തോഷ്,ലീന കൃഷ്ണകുമാർ, ബാലചന്ദ്രൻ ഉറുമ്പിൽ, വി എൻ കരുണാകരൻ,മറിയമ്മ ആന്റണി,മാർട്ടിൻ വാഴവേലി,റെജി കാവുങ്കൽ, ജോർജുകുട്ടി കടമപുഴ, ബിജു മിഷ്യൻ പറമ്പിൽ, മധു താവുകുന്നേൽ, ജോയ് മുണ്ടു വേലിക്കുന്നൽ എന്നിവർ പ്രസംഗിച്ചു.
റൈസിംഗ് പൂഞ്ഞാർ 2k25 വൻ വിജയം ; നിക്ഷേപ സംഗമത്തിൽ 308 സംരംഭകരിൽ നിന്നായി 2456.88 കോടി രൂപയുടെ താല്പര്യപത്രങ്ങൾ ലഭിച്ചു
ഈരാറ്റുപേട്ട : സംസ്ഥാനം വ്യവസായ പുരോഗതിയിൽ കുതിച്ചുചാട്ടത്തിൽ ആണെന്നും വ്യവസായ പുരോഗതിക്കായി ഡിജിറ്റലൈസേഷന്റെ എല്ലാ സാധ്യതകളും ഉപയോഗപ്പെടുത്തുമെന്നും മന്ത്രി പി. രാജീവ് പ്രസ്താവിച്ചു. അഡ്വ. സെബാസ്റ്റ്യൻ കുളത്തുങ്കൽ എംഎൽഎയുടെ നേതൃത്വത്തിൽ പൂഞ്ഞാർ നിയോജകമണ്ഡലം കേന്ദ്രീകരിച്ച് റൈസിംഗ് പൂഞ്ഞാർ 2k25 എന്ന പേരിൽ ഈരാറ്റുപേട്ടയിൽ നടന്ന നിക്ഷേപ സംഗമം ഉദ്ഘാടനം ചെയ്ത് സംസാരിക്കുകയായിരുന്നു മന്ത്രി. അഡ്വ. സെബാസ്റ്റ്യൻ കുളത്തുങ്കൽ എംഎൽഎ യോഗത്തിൽ അധ്യക്ഷത വഹിച്ചു.
സംഗമത്തോടനുബന്ധിച്ചു നടത്തിയ പ്രദർശന സ്റ്റാളുകളുടെ ഉദ്ഘാടനം ജലവിഭവ വകുപ്പ് മന്ത്രി റോഷി അഗസ്റ്റിൻ നിർവഹിച്ചു. പാറത്തോട് കേന്ദ്രീകരിച്ച് പാറത്തോട് സർവീസ് സഹകരണ ബാങ്കിന്റെ നേതൃത്വത്തിൽ പുതുതായി രൂപീകരിച്ച അഗ്രോ ഫുഡ് പാർക്കിന്റെ പ്രഖ്യാപനവും, ലോഗോ പ്രകാശനവും രാജ്യസഭാ എംപി ജോസ് കെ മാണി നിർവഹിച്ചു. ജില്ലാ കളക്ടർ ജോൺ വി.സാമുവൽ ഐഎഎസ്, വ്യവസായ വകുപ്പ് ഡയറക്ടർ വിഷ്ണുരാജ് ഐഎഎസ്, അഡീഷണൽ ഡയറക്ടർ ജി രാജീവ്,ജില്ലാ വ്യവസായ കേന്ദ്രം ജനറൽ മാനേജർ വി.ആർ രാകേഷ്, ഈരാറ്റുപേട്ട നഗരസഭ സ്റ്റാൻഡിങ് കമ്മിറ്റി ചെയർപേഴ്സൺ സുഹാന ജിയാസ് തുടങ്ങിയവർ പ്രസംഗിച്ചു.
തുടർന്ന് മന്ത്രി പി.രാജീവ് സംരംഭകരുമായി മുഖാമുഖം നടത്തി. മന്ത്രിയോടൊപ്പം പാനൽ ഡിസ്കഷനിൽ ഓക്സിജൻ സിഇഒ ഷിജോ കെ തോമസ്, അജ്മി ഗ്രൂപ്പ് ഡയറക്ടർ റാഷിദ് കെ.എ, നിഷ ഗാർമെന്റ്സ് മാനേജിങ് ഡയറക്ടർ ഹാജി ഷെരീഫ് കാസിം, റീസ് ഗ്രൂപ്പ് മാനേജിംഗ് ഡയറക്ടർ രാജി മാത്യു, വെബ് ആൻഡ് ക്രാഫ്റ്റ് സി ഒ ജിലു ജോസഫ്, സൺറൈസ് ഗ്രൂപ്പ് മാനേജ്മെന്റ് ഡയറക്ടർ ഡോ.ഹാഫിസ് റഹ്മാൻ, തീക്കോയി ഫാംസ് പ്രതിനിധി പ്രതാപചന്ദ്രൻ ,വ്യാപാരി വ്യവസായി പ്രതിനിധികളായ തോമസുകുട്ടി മുതുപുന്നക്കൽ ,എ എം എ ഖാദർ,
തുടങ്ങിയവർ സംസാരിച്ചു.
നിക്ഷേപ സംഗമത്തിൽ 308 സംരംഭകരിൽ നിന്നായി 2456.88 കോടി രൂപയുടെ താല്പര്യപത്രങ്ങൾ ലഭിച്ചു. ഇതിൽ 38 സംരംഭങ്ങൾ പത്തു കോടി രൂപയിലധികം മുതൽമുടക്ക് വരുന്നതും, 88 സംരംഭങ്ങൾ ഒരു കോടിയിലധികം രൂപ മുതൽമുടക്ക് വരുന്നതുമാണ്. ഇതുവഴി 11342 തൊഴിലവസരങ്ങൾ സൃഷ്ടിക്കപ്പെടുമെന്ന് പ്രതീക്ഷിക്കപ്പെടുന്നു. റൈസിങ് പൂഞ്ഞാറിൽ ലഭിച്ച താല്പര്യ പത്രങ്ങൾ ഒരു പ്രത്യേക-ഡാഷ് ബോർഡ് രൂപീകരിച്ച് നടപടിക്രമങ്ങൾ പാലിച്ച് സമയബന്ധിതമായി സംരംഭങ്ങൾ ആരംഭിക്കാൻ അവസരം ഒരുക്കുമെന്നും മന്ത്രി പി.രാജീവ് അറിയിച്ചു. മണ്ഡലത്തിന്റെ സാധ്യതകളും, സാഹചര്യങ്ങളും അനുസരിച്ച് ടൂറിസം മേഖല, അഗ്രി ഫുഡ് പ്രോസസിംഗ്, ഐടി സംരംഭങ്ങൾ, മരാധിഷ്ഠിത വസായങ്ങൾ, റബർ അധിഷ്ഠിത വ്യവസായങ്ങൾ , എന്നീ സെക്ടറുകളെ ഫോക്കസ് ചെയ്തും എന്നാൽ എല്ലാ സംരംഭക മേഖലകളെയും പ്രോത്സാഹിപ്പിച്ചും നിക്ഷേപം ആകർഷിക്കുകയാണ് ലക്ഷ്യമെന്ന് അഡ്വ. സെബാസ്റ്റ്യൻ കുളത്തുങ്കൽ എംഎൽഎ അധ്യക്ഷ പ്രസംഗത്തിൽ പറഞ്ഞു
മുണ്ടക്കയത്ത് തീ പിടിച്ചതല്ല, പിടിപ്പിച്ചത് : പ്രതി അറസ്റ്റിൽ .
മുണ്ടക്കയം : ടൗണിൽ ഹരിത കർമ്മ സേനയുടെ പ്ലാസ്റ്റിക് ശേഖരിച്ചിരുന്ന കെട്ടിടത്തിൽ ഞായറാഴ്ച വൈകുന്നേരം ഉണ്ടായ വൻ തീപിടുത്തത്തിന്റെ നിഗൂഢതയുടെ ചുരുൾ അഴിഞ്ഞു. തീ പിടിച്ചതല്ല, മനപൂർവം ഒരാൾ തീ പിടിപ്പിച്ചതാണെന്ന് പോലീസ് കണ്ടെത്തി.
സംഭവത്തിൽ കൂവപ്പള്ളി സ്വദേശി തട്ടാർക്കുന്നേൽ സജു ജോസഫ് (45) നെയാണ് മുണ്ടക്കയം സി.ഐ. എം.ആർ രാകേഷ് കുമാറും സംഘവും അറസ്റ്റു ചെയ്തത്. ഇയാൾ പ്ലാസ്റ്റിക് മാലിന്യത്തിന് തീ കൊളുത്തുകയായിരുന്നു. സമീപത്തെ സി.സി. ടി.വി ദൃശ്യത്തിൽ നിന്നാണ് ഇയാളെ തിരിച്ചറിഞ്ഞത്. തുടർന്നു നടന്ന തെരച്ചിലിൽ പ്രതിയെ കണ്ടെത്തുകയും ചോദ്യം ചെയ്യലിൽ കുറ്റം സമ്മതിക്കുകയുമായിരുന്നു. കാഞ്ഞിരപ്പള്ളി , പെരുവന്താനം പൊലീസ്റ്റേഷനുകളിൽ മോഷണ – അടിപിടി കേസുകളിൽ പ്രതിയാണിയാളെന്ന് പൊലീസ് പറഞ്ഞു.
മുണ്ടക്കയം പഞ്ചായത്തിലെ വിവിധ വാർഡുകളിൽ നിന്നും ശേഖരിച്ചു വെച്ചിരുന്ന പ്ലാസ്റ്റിക്ക് ശേഖരത്തിനാണ് ഞായറാഴ്ച തീ പിടിച്ചത്. തീപിടുത്തതിനിടയിൽ സ്ഫോടന ശബ്ദം കേട്ടതായും നാട്ടുകാർ പറഞ്ഞു . കാഞ്ഞിരപ്പള്ളിയിൽ നിന്നുമെത്തിയ ഫയർഫോഴ്സും, പൊലീസും നാട്ടുകാരും ചേർന്നാണ് തീയണച്ചത്. ഷോർട്ട് സർക്യൂട്ട് മൂലമാണ് തീ പിടിച്ചതെന്ന് ആദ്യം കരുതിയെങ്കിലും, സംഭവ സ്ഥലത്ത് അതിനുള്ള സാഹചര്യം ഇല്ലാതിരുന്നതിനാൽ പോലീസ് ആദ്യം മുതൽ തന്നെ, ആരോ മനപൂർവം കത്തിച്ചത് ആണെന്ന് സംശയിച്ചിരുന്നു .
പാലത്തിലെ കുഴി അപകടങ്ങൾക്ക് കാരണമാകുന്നു
മണിമല: വലിയ പാലത്തിലെ കുഴികളില് ചാടി ഇരു ചക്ര വാഹനങ്ങള് അപകത്തില്പ്പെടുന്നു. ഹൈവേയിലെ ഈ കുഴി ഒരു മാസം മുമ്പ് അടച്ചെങ്കിലും വീണ്ടും പഴയതു പോലെയായി. പുനലൂര് മൂവാറ്റുപുഴ ഹൈവേയിലെ ഈ കുഴി ഏറെ അപകട സാധ്യതയാണുയര്ത്തുന്നത്. അടിയന്തിരമായി കുഴി അടയ്ക്കാന് അധികൃതര് തയ്യാറാവണം.
തൊഴിലധിഷ്ഠിത കോഴ്സുകളുമായി എരുമേലി എം. ഈ. എസ്. കോളേജ്
എരുമേലി : ആർട്ടിഫിഷ്യൽ ഇന്റലിജന്റ്സ് ആൻഡ് മെഷിൻ ലേണിങ്, ക്ലൗഡ് കംപ്യൂട്ടിങ്, ലോജിസ്റ്റീക്സ് ആൻഡ് സപ്ലൈ ചെയിൻ മാനേജ്മെന്റ്, ഏവിയേഷൻ ആൻഡ് എയർപോർട്ട് മാനേജ്മെന്റ്, ഹോസ്പിറ്റൽ അഡ്മിനിസ്ട്രേഷൻ, എ. സി. സി. എ, എ. പി തുടങ്ങിയ കോഴ്സുകൾ ഉൾപെടുത്തിയതായി. മാനേജ്മെന്റ് പ്രതിനിധികൾ വാർത്താസമ്മേളനത്തിൽ അറിയിച്ചു. ബി. ബി. എ, ബി. സി. എ, ബി. കോം, ബി. എസ്. സി സൈക്കോളജി, ബി. എ ഇംഗ്ലീഷ്, എം. കോം, എം- എസ്. ഡബ്ല്യൂ, തുടങ്ങി നിലവിലുള്ള കോഴ്സുകകൾക്ക് പുറമെയാണ് പുതിയ കോഴ്സുകൾ.
ഈ വർഷം ബി. കോം പ്രവേശനം എടുക്കുന്ന വിദ്യാർഥികൾക്ക് സെമെസ്റ്റർ ഫീസിൽ 50 ശതമാനം ഇളവ് അനുവദിക്കും.
വൈസ് ചെയർമാൻ ടി. എസ് റെഷീദ്, സെക്രട്ടറി സി. യു അബ്ദുൽ കരീം, ട്രഷറർ പി. എ ഇർഷാദ്,പി. എച് നജീബ്, പ്രിൻസിപ്പൽ പ്രൊഫ ഡോ എ . എസ് അനിൽ കുമാർ തുടങ്ങിയവർ പങ്കെടുത്തു.
എ. ആർ രാജപ്പൻ നായരെയും ബേബി മണപ്പറമ്പിലിനെയും അനുസ്മരിച്ചു
എരുമേലി : കെ.പി -സി.സി മുൻ അധ്യക്ഷൻ തെന്നല ബാലകൃഷ്ണപിള്ളയുടെ അനുശോചന യോഗവും
ബ്ലോക്ക് കോൺഗ്രസ് കമ്മിറ്റിയുടെ ജനറൽ സെക്രട്ടറിമാരായിരുന്ന എ. ആർ രാജപ്പനായരുടെയും ,ബേബി മണപ്പറമ്പിലിന്റെയും
അനുസ്മരണവും ബ്ലോക്ക് കോൺഗ്രസ് കമ്മിറ്റിയുടെ നേതൃത്വത്തിൽ എരുമേലിയിൽ നടത്തി.
ബ്ലോക്ക് കോൺഗ്രസ് കമ്മിറ്റിയുടെ പ്രസിഡന്റ് ബിനു മറ്റക്കര അധ്യക്ഷത വഹിച്ച യോഗം കോൺഗ്രസ് രാഷ്ട്രീയ കാര്യ സമതി അഗം
ആന്റോ ആന്റണി എം.പി ഉദ്ഘാടനം ചെയ്തു.ഡി.സി.സി പ്രസിഡൻ്റ് നാട്ടകം സുരേഷ് മുഖ്യ പ്രഭാഷണം നടത്തി.
കെ.പി.സി.സി ജനറൽ സെക്രട്ടറി അഡ്വ.പി എ സലിം, പ്രകാശ് പുളിക്കൻ, റോയി കപ്പലുമാക്കൽ,റെജി അമ്പാറ,വിജയമ്മ ബാബു,കോരുത്തോട് പഞ്ചായത്ത് പ്രസിഡന്റ് ജാൻസി സാബു തുടങ്ങിയവർ പ്രസംഗിച്ചു. രാജപ്പൻ നായരുടെയും, ബേബി മണപ്പറമ്പിലിന്റെയും കുടുംബാംഗങ്ങളും യോഗത്തിൽ പങ്കെടുത്തു.
എൻ.സി.സി ആനുവൽ ട്രെയിനിങ് ക്യാമ്പിന് തുടക്കമായി
എരുമേലി : എം.ഇ.എസ് കോളേജ് എരുമേലിയിൽ എൻ.സി.സി കോട്ടയം ഗ്രൂപ്പിന്റെ കീഴിൽ 16 കേരള ബറ്റാലിയൻ എൻ.സി.സി കോട്ടയത്തിന്റെ ആഭിമുഖ്യത്തിൽ ദശദിന കംമ്പയിൻഡ് ആനുവൽ ട്രെയിനിങ് ക്യാമ്പ് ആരംഭിച്ചു. 16 കേരള കമാൻഡിംഗ് ഓഫീസർ കേണൽ പി. ശ്രീനിവാസൻ ഉദ്ഘാടനം ചെയ്തു.
ബറ്റാലിയന്റെ കീഴിലുള്ള മുപ്പതിയഞ്ച് വിദ്യാഭ്യാസ സ്ഥാപനങ്ങളിൽ നിന്നും സീനിയർ, ജൂനിയർ ഡിവിഷനിലായി 500 കേഡറ്റുകൾ പങ്കെടുക്കുന്ന ക്യാമ്പിൽ സൈനിക പരീശീലനം, ഫൈയറിങ്ങ് ട്രെയിനിങ്, ഡ്രിൽ, ഡിസാസ്റ്റർ മാനേജ്മെൻറ് , വ്യക്തിത്വ വികസനം, ആരോഗ്യം, സ്വയം പ്രതിരോധം, ട്രാഫിക് സുരക്ഷ, തുടങ്ങിയ വിഷയങ്ങളിൽ പരിശീലന ക്ലാസുകൾ നടത്തും. പതിനാറിന് ക്യാമ്പ് സമാപിക്കും.
.
വിദ്യാർഥികളെ ആദരിച്ചു
മുണ്ടക്കയം : കേരള കോൺഗ്രസ് എം വണ്ടൻപതാൽ മേഖലാ കമ്മിറ്റിയുടെ ആഭിമുഖ്യത്തിൽ എസ്.എസ്.എൽ.സി ,പ്ലസ് ടു പരീക്ഷകൾക്ക് എല്ലാ വിഷയങ്ങൾക്കും എ- പ്ലസ് നേടിയ വിദ്യാർഥികളെ ആദരിച്ചു. പാപ്പച്ചി പൊട്ടനാനിയുടെ അധ്യക്ഷതയിൽ ചേർന്ന സമ്മേളനം അഡ്വ . സെബാസ്റ്റ്യൻ കുളത്തിങ്കൽ എം.എൽ.എ ഉദ്ഘാടനം ചെയ്തു. ചാർലി കോശി ,തങ്കച്ചൻ കാരക്കാട് ,ജോയി പുളിക്കൽ, ടി. ജെ❕ ചാക്കോ, അനിയാച്ചന് മൈലപ്ര ,ജോസഫ് വള്ളിപ്പറമ്പിൽ എന്നിവർ പ്രസംഗിച്ചു.
മേഖല വാർഷിക ജനറൽബോഡി
കാഞ്ഞിരപ്പള്ളി: ദക്ഷിണകേരള ലജനത്തുൽ മുഅല്ലിമീൻ കാഞ്ഞിരപ്പള്ളി മേഖല വാർഷിക ജനറൽബോഡി യോഗം ആനക്കല്ല് ദാറുൽ ഉലൂം മദ്രസ ഹാളിൽ നടന്നു. അബ്ദുറസാഖ് മൗലവിയുടെ അധ്യക്ഷതയിൽ കൂടിയ യോഗം സംസ്ഥാന ജനറൽ സെക്രട്ടറി കടുവയിൽ ഇർഷാദ് ബാഖവി യോഗം ഉദ്ഘാടനം ചെയ്തു.
2025 -26 വർഷത്തേക്കുള്ള തെരഞ്ഞെടുപ്പും നടന്നു. ഭാരവാഹികളായി ഷിബിലി മൗലവി (മേഖലാ പ്രസിഡന്റ് )
അബ്ദുൾ അലിം മൗലവി പൂതക്കുഴി, സിറാജുദ്ദീൻ മൗലവി ആനക്കല്ല് (വൈസ് പ്രസിഡന്റ്മാർ),സാദിഖ് മൗലവി അമാൻ നഗർ (ജനറൽ സെക്രട്ടറി)
ജോയിൻ സെക്രട്ടറി അബ്ദുസമദ് മൗലവി ചാമംപതാൽ, അബ്ദുൾ നാസർ മൗലവി പട്ടിമറ്റം (ജോയിന്റ് സെക്രട്ടറിമാർ),
അബ്ദുറസാഖ് മൗലവി പാറത്തോട് (ട്രഷറർ), കെ. എച്ച്. എം. ബഷീർ മൗലവി കാഞ്ഞിരപ്പള്ളി ( പരീക്ഷാ ബോർഡ് കൺവീനർ) അലി മൗലവി ചാമംപതാൽ (ജോയിൻ്റ് കൺവീനർ),അബ്ദുസമദ് മൗലവി കാഞ്ഞിരപ്പള്ളി (ക്ഷേമനിധി ചെർമാൻ), അബ്ദുൽ ജലീൽ മൗലവി ആനക്കല്ല് (കൺവീനർ), അർഷദ് മൗലവി കല്ലുകൾ നഗർ (ട്രഷറർ) എന്നിവരെയും എക്സിക്യൂട്ടീവ് അംഗങ്ങളായി ബഷീർ മൗലവി മണങ്ങല്ലൂർ, സബീർ മൗലവി മുക്കാലി, ഹബീബുള്ള മൗലവി ചിറക്കടവ്, ഇക്ബാൽ മൗലവി പനമറ്റം, ഷിയാസ് മൗലവി മേലേറ്റ് തകിടി, അഫ്സൽ മൗലവി കൊടുവന്തനം, അൽത്താഫ് മൗലവി ഇടപ്പള്ളി, ഷാനവാസ് മൗലവി പട്ടിമറ്റം തുടങ്ങിയവരെയും തിരഞ്ഞെടുത്തു.
.
തെരുവുനായശല്യം പരിഹരിക്കണം: യുടിയുസി
എരുമേലി ∙ നഗരത്തിലും പരിസരങ്ങളിലും അലഞ്ഞു തിരിഞ്ഞു നടക്കുന്ന തെരുവു പട്ടികളെ നീക്കം ചെയ്യുന്നതിനു നടപടി സ്വീകരിക്കണമെന്ന് യുടിയുസി കൺസ്ട്രക്ഷൻ ലേബർ യൂണിയൻ ജില്ലാ കമ്മിറ്റി ആവശ്യപ്പെട്ടു. എരുമേലി പേട്ടക്കവല, പ്രൈവറ്റ് ബസ് സ്റ്റാൻഡ്, കെഎസ്ആർടിസി ബസ് സ്റ്റാൻഡ് തുടങ്ങി എല്ലാ പ്രദേശങ്ങളിലും തെരുവുനായ്ക്കൂട്ടം അലഞ്ഞുതിരിഞ്ഞു നടക്കുകയാണ്.
സ്കൂൾ, കോളജ് വിദ്യാർഥികൾക്കും നാട്ടുകാർക്കും കാൽനട യാത്രക്കാർക്കും ഒരുപോലെ ഭീഷണി ഉയർത്തുന്ന നായകളെ നീക്കം ചെയ്യണം.
.എൻ. സദാനന്ദൻ, പി.കെ. റസാഖ്, വി.എൻ. വിനോദ്, ഏ.കെ. സിബി, സാബു ഇടുക്കി എന്നിവർ പ്രസംഗിച്ചു.
.
പ്ലാച്ചേരി മുതൽ മുക്കട വരെ വനപാതയുടെ ഇരുവശങ്ങളിൽ നിന്നും മാലിന്യം നീക്കി സന്നദ്ധപ്രവർത്തകർ
എരുമേലി ∙ പ്ലാച്ചേരി മുതൽ മുക്കട വരെയുള്ള ഒരു കിലോമീറ്റർ വനപാതയുടെ ഇരുവശങ്ങളിൽ നിന്നും സന്നദ്ധപ്രവർത്തകർ നീക്കിയത് 25 ടൺ മാലിന്യം.
ഇന്നലെ മാർ ക്രിസോസ്റ്റം ഫൗണ്ടേഷൻ കേരള വനം വന്യജീവി വകുപ്പിന്റെ സഹകരണത്തിൽ പാതയോര സൗന്ദര്യവൽക്കരണ പദ്ധതിയായ ഹരിതം അരണ്യകത്തിന്റ രണ്ടാംഘട്ടമായി പ്ലാച്ചേരി –എരുമേലി റോഡിൽ പ്ലാച്ചേരി മുതൽ മുക്കട വരെയുള്ള വനപാതയുടെ ഇരു വശങ്ങളും ശുചീകരിച്ചത്.
ഇവിടെ തള്ളിയിരുന്ന മാലിന്യങ്ങൾ ഭൂരിഭാഗവും വ്യാവസായിക, കച്ചവട സ്ഥാപനങ്ങളിൽ നിന്നുള്ളവ ആയിരുന്നെന്ന് ശുചീകരണത്തിനു നേതൃത്വം നൽകിയ മാർ ക്രിസോസ്റ്റം ഫൗണ്ടേഷൻ ജനറൽ സെക്രട്ടറി റവ. തോമസ് കോശി പനച്ചമൂട്ടിൽ പറഞ്ഞു. ടൺകണക്കിനു ഡയപ്പറുകളാണു റോഡിന്റെ അരികിൽ തള്ളിയിരിക്കുന്നത്. ഇത് ഏതെങ്കിലും ആശുപത്രികളിൽ നിന്നുള്ളതാണെന്നു സംശയിക്കുന്നു.
നിർമാണസ്ഥലത്തെ മാലിന്യങ്ങൾ, മദ്യക്കുപ്പികൾ, മത്സ്യം, മാംസ മാലിന്യങ്ങൾ, കെട്ടിട അവശിഷ്ടങ്ങൾ, തെർമോക്കോൾ പെട്ടികളുടെ അവശിഷ്ടങ്ങൾ തുടങ്ങിയ മാലിന്യങ്ങളാണു തള്ളിയിരുന്നത്. നൂറുകണക്കിനു സന്നദ്ധപ്രവർത്തകരെ കൂടാതെ മണ്ണുമാന്തി, ടിപ്പർ എന്നിവയും സഹായത്തിനുണ്ടായിരുന്നു.
∙ മാലിന്യം നീക്കം ചെയ്ത റോഡിന്റെ ഇരുവശങ്ങളിലും ക്യാമറകൾ സ്ഥാപിക്കും. ഇതിനായി 5 ക്യാമറകളാണ് ലഭ്യമായിട്ടുള്ളത്. ഇവ ഉടൻ സ്ഥാപിക്കും. സൗരോർജ്യത്തിൽ പ്രവർത്തിക്കുന്ന ക്യാമറകളാണ് സ്ഥാപിക്കുന്നത്. രാത്രി കാലത്തും മികവോടെ ദൃശ്യങ്ങൾ ലഭ്യമാകും.
∙ വനമേഖലയിലെ മാലിന്യനിർമാർജനത്തിനു സഹായിക്കാൻ 6 ജില്ലകളിൽ നിന്നുള്ള ഗ്രീൻ റെസ്ക്യൂ ആക്ഷൻ ഫോഴ്സ് (ഗ്രാഫ്) പ്രവർത്തകരെത്തി.തിരുവനന്തപുരം, മലപ്പുറം, പാലക്കാട്, എറണാകുളം, കോഴിക്കോട് ജില്ലകളിൽ നിന്നു പ്രവർത്തകർ പങ്കെടുത്തു.
ഇവർ ഇന്നു കൂടി എരുമേലി വനമേഖലയിലെ പ്ലാസ്റ്റിക് മാലിന്യങ്ങൾ നീക്കം ചെയ്യും. വനം– വന്യജീവി വാരാഘോഷത്തിന്റെ സംസ്ഥാനത്തിന്റെ വിവിധ ഭാഗങ്ങളിലെ വനമേഖല ശുചീകരിക്കുന്നതിന്റെ ഭാഗമായിട്ടാണ് ഇവർ പ്ലാച്ചേരി– മുക്കട റോഡ് ശുചീകരിക്കുന്നതിന് എത്തിയത്.
∙ മാർ ക്രിസോസ്റ്റം ഫൗണ്ടേഷൻ, വനം വകുപ്പ്, പഴവങ്ങാടി, മണിമല പഞ്ചായത്തുകൾ, വനം വകുപ്പ് പ്ലാച്ചേരി സ്റ്റേഷൻ, ഗ്രീൻ റെസ്ക്യൂ ആക്ഷൻ ഫോഴ്സ് (ഗ്രാഫ്), ദ്രാവിഡവർഗ ഐക്യമുന്നണി, കുടുംബശ്രീ യൂണിറ്റുകൾ, മുക്കട ഹെബ്രോൻ മാർത്തോമ്മാ ചർച്ച്, മക്കപ്പുഴ ഫാത്തിമ മാതാ കത്തോലിക്കാ ദേവാലയം, കെസിസി, കരിക്കാട്ടൂർ മാർത്തോമ്മാ ചർച്ച്, കൂവക്കാവ് ജിഎച്ച്എസ്, കറിക്കാട്ടൂർ സിസിഎം എച്ച്എസ്എസ്, റാന്നി സെന്റ് തോമസ് കോളജ്, എരുമേലി എംഇഎസ് കോളജ്, എരുമേലി ഡവലപ്മെന്റ് കൗൺസിൽ, മാർത്തോമ്മാ യുവജനസഖ്യം, മുക്കട യൂത്ത് ക്ലബ് തുടങ്ങിയ സംഘടനകൾ പങ്കെടുത്തു.
പഴവങ്ങാടി പഞ്ചായത്ത് പ്രസിഡന്റ് റൂബി കോശി ഉദ്ഘാടനം ചെയ്തു.ഹരിതം ആരണ്യകം പദ്ധതി ചെയർമാൻ ടി.കെ.സാജു അധ്യക്ഷത വഹിച്ചു.
മാർ ക്രിസോസ്റ്റം ഫൗണ്ടേഷൻ പ്രസിഡന്റ് റെജി കൊപ്പാറ, ജനറൽ സെക്രട്ടറി റവ.തോമസ് കോശി പനച്ചമൂട്ടിൽ, പഞ്ചായത്ത് അംഗങ്ങളായ സുജ ബാബു എം.ജി.ശ്രീകുമാർ, പ്രഫ. എം.ജി.വർഗീസ്, ജോൺ സാമുവൽ, ഗ്രീൻ റെസ്ക്യൂ ആക്ഷൻ ഫോഴ്സ് പ്രസിഡന്റ് രതീഷ്കുമാർ സൈലന്റ്വാലി, ഡപ്യൂട്ടി റേഞ്ച് ഓഫിസർമാരായ ബി.വിനോദ്കുമാർ, എസ്.സനൽ രാജ്, സംഗീത ആലപ്പുഴ, ജോമോൻ പാക്കാട്ട്, പി.ഡി. ഷൈജു, ഷാജി കുര്യാക്കോസ് ജോമോൻ ചാത്തനാട്ട്, പി.ജെ.ബിജു, സിബിൻ സി. തോമസ്, ഡോ. എബിൻ, രാജ്മോഹൻ തമ്പുരാൻ, വി.ടി.തോമസ്കുട്ടി, ബാബു തോമസ്, നിഷ ഇബ്രാഹിം, അഷ്റഫ് മാളിക്കുന്നിൽ എന്നിവർ പ്രസംഗിച്ചു.
അധ്യാപക ഒഴിവുകൾ
പനമറ്റം: ഗവ.എച്ച്എസ്എസിൽ എച്ച്എസ്എസ്ടി ഇക്കണോമിക്സ്(ജൂനി.), എൽപിഎസ്ടി താത്കാലിക ഒഴിവുകളുണ്ട്. അഭിമുഖം 11-ന് രാവിലെ 10.30-ന്.
അധ്യാപക ഒഴിവ്
പാറത്തോട് : ഇടക്കുന്നം ഗവൺമെന്റ് ഹയർ സെക്കണ്ടറി സ്കൂളിൽ ഹയർ സെക്കണ്ടറി വിഭാഗത്തിൽ സോഷ്യോളജി (ജൂനിയർ) ഒഴിവിലേയ്ക്ക് ദിവസവേതനാടിസ്ഥാനത്തിൽ അദ്ധ്യാപക നിയമനത്തിനുള്ള ഇന്റർവ്യൂ ജൂൺ 13 വെള്ളിയാഴ്ച 11 ന് നടക്കും. ഉദ്യോഗാർത്ഥികൾ അസൽ രേഖകളുമായി നേരിട്ട് ഓഫീസിൽ ഹാജരാകണം
വൈദ്യുതി മുടങ്ങും
കെ എസ് ഇ ബി കാഞ്ഞിരപ്പള്ളി സെക്ഷന്റെ പരിധിയിൽ വരുന്ന പാറക്കടവ് – 1 ( മസ്ജിദ് ജംഗ്ഷൻ), പാറക്കടവ് – 2 (കെഎംഎ നഗർ), മേലാട്ടു തകിടി ട്രാൻസ്ഫോർമറുകളിൽ തിങ്കളാഴ്ച രാവിലെ 9.30 മുതൽ വൈകുന്നേരം 5.30 വരെ വൈദ്യുതി വിതരണം തടസപ്പെടും.
തയ്യൽ പരിശീലനത്തിന് ഐഎച്ച്ആർഡി കോളജിൽ സെന്റർ
കാഞ്ഞിരപ്പള്ളി ∙ പ്രധാനമന്ത്രി വിശ്വകർമ യോജന പദ്ധതിയിൽ തയ്യൽ പരിശീലനത്തിന് ഐഎച്ച്ആർഡി കോളജിൽ സെന്റർ അനുവദിച്ചു.
തയ്യൽ തൊഴിലിൽ താൽപര്യമുള്ളവർക്കു കോമൺ സർവീസ് സെന്റർ മുഖേന അപേക്ഷിക്കാം. ഫോൺ: 04828 206480, 6238230652
ചരമം : മുണ്ടുപാലത്തിങ്കൽ എം.വി. ജോസഫ് (കുഞ്ഞേട്ടൻ -91)
കൂട്ടിക്കൽ : കാവാലി മുണ്ടുപാലത്തിങ്കൽ എം.വി. ജോസഫ് (കുഞ്ഞേട്ടൻ-91) നിര്യാതനായി. സംസ്കാരം വ്യാഴാഴ്ച 2.30ന് കാവാലി സെന്റ് മേരീസ് പള്ളി സെമിത്തേരിയിൽ. ഭാര്യ: മറിയക്കുട്ടി .ആനക്കല്ല് ചൂനാട്ട് കുടുംബാംഗം.
മക്കൾ : ജെസ്സി വടശേരിൽ , ഫാ. ഡോ. ബാബു മുണ്ടുപാലം (പ്രിൻസിപ്പൽ , സലേഷ്യൻ കോളജ്, ഡാർജിലിംഗ്), പരേതനായ സജൻ , ബിനോയ് (സ്പെഷ്യൽ വില്ലേജ് ഓഫീസർ, ഇലപ്പള്ളി), ബിജോയ് മുണ്ടുപാലം (ഗ്രാമപഞ്ചായത്ത് പ്രസിഡന്റ് , കൂട്ടിക്കൽ ), ബിൻസി (യുഎസ്എ), ടോണി (ന്യൂഡൽഹി).
മരുമക്കൾ : ജോയി വടശേരിൽ (ചള്ളാവയൽ), ജെസ്സി ചെറുവള്ളിൽ (മുട്ടം), ഡാലിയ ചിറയ്ക്കൽ (കരിനിലം), ജേക്കബ് തോമസ് വെട്ടിക്കൽ (യു.എസ്.എ), നീതു (ന്യൂഡൽ ഹി).
പരേതന്റെ ഭൗതിക ശരീരം ബുധനാഴ്ച ഉച്ച കഴിഞ്ഞ് 4 ന് ഭവനത്തിൽ കൊണ്ടുവരും.
ചരമം : കല്ലറയ്ക്കൽ കെ.എസ് ജോസഫ് (91)
വെച്ചൂച്ചിറ : പരുവ കല്ലറയ്ക്കൽ കെ.എസ് ജോസഫ് (91) നിര്യതനായി . സംസ്കാരം ശുശ്രുഷ ബുധൻ 11 ന് ഭവനത്തിൽ ആരംഭിച്ച് നിരവ് സെന്റ് മേരീസ് പള്ളി സെമിത്തേരിയിൽ.
ഭാര്യ : വഞ്ചിമല മറ്റമുണ്ടയിൽ പരേതയായ മറിയക്കുട്ടി.
മക്കൾ : മേഴ്സി ഇടത്തിൽ [ എറണാകുളം ] , ജെസി മുക്കാലടിയിൽ [ അരുവിത്തുറ ] , ബൈജു [ പരുവ ] , പരേതനായ ബാബു ചീനിക്കുഴി.
മരുമക്കൾ : ജോസഫ് ഇടത്തിൽ [ എറണാകുളം ] , ബേബി മുക്കാലടിയിൽ [ അരുവിത്തുറ ] , കുഞ്ഞുമോൾ പള്ളി വാതുക്കൽ [ മുക്കുട്ടുതറ ] , പരേതയായ ലൂസി പാറയിൽ ഏന്തയാർ.
ഡോക്ടർ സിസ്റ്റർ ബെന്നോ മേരി പുളിമൂട്ടിൽ എസ്എച്ച് (70) (അനന്തക്കാട്ട്) നിര്യാതയായി
പൊടിമറ്റം: തിരുഹൃദയ സന്യാസിനീസമൂഹം കാഞ്ഞിരപ്പള്ളി വിമലാ പ്രൊവിൻസ് അംഗമായ ഡോക്ടർ സിസ്റ്റർ ബെന്നോ മേരി പുളിമൂട്ടിൽ എസ്എച്ച് (70) (അനന്തക്കാട്ട്) നിര്യാതയായി. 10-06-2025, ചൊവ്വ കമ്പംമെട്ട് സെന്റ് ജോസഫ് പള്ളിയിൽ 2 മണി മുതൽ 3 മണി വരെ പൊതുദർശനത്തിനുശേഷം വൈകുന്നേരം ആറിന് പൊടിമറ്റം പ്രൊവിൻഷ്യൽ ഹൗസിൽ കൊണ്ടുവരുന്നതാണ്.
സംസ്കാരം 11-06-2025 ബുധൻ ഉച്ചകഴിഞ്ഞ് രണ്ടിന് എസ്എച്ച് പ്രൊവിൻഷ്യൽ ഹൗസിൽ വിശുദ്ധ കുർബാനയോടെ ആരംഭിക്കുന്നതും തുടര്ന്നുള്ള ശുശ്രൂഷകൾ കാഞ്ഞിരപ്പള്ളി രൂപതാധ്യക്ഷൻ മാര് ജോസ് പുളിക്കലിന്റെ കാർമികത്വത്തിൽ പൊടിമറ്റം സെന്റ് മേരീസ് പള്ളിയിൽ നടത്തപ്പെടുന്നതുമാണ്.
വലിയതോവാള പുളിമൂട്ടിൽ (അനന്തക്കാട്ട്) പരേതരായ ദേവസ്യ – മറിയക്കുട്ടി ദമ്പതികളുടെ മകളാണ്. പരേത വിയന്ന യൂണിവേഴ്സിറ്റി ഓസ്ട്രിയ, സെന്റ് ജോണ്സ് കട്ടപ്പന, കെജിഎം ഹോസ്പിറ്റല് കമ്പംമെട്ട്, നിര്മല ഹോസ്പിറ്റല് ആനിക്കാട്, അസീസി ഹോസ്പിറ്റല് മുക്കൂട്ടുതറ, വെച്ചൂച്ചിറ ക്ലിനിക്, കരുണാഭവന് കോരുത്തോട്, ഹോളിക്രോസ് ഹോസ്പിറ്റല് കൊട്ടിയം, ചെറുപുഷ്പം ഹോസ്പിറ്റല് പാലാ, മേരി ക്വീൻസ് ഹോസ്പിറ്റൽ 26-ാം മൈൽ , മെഡിക്കൽ ട്രസ്റ്റ് ഹോസ്പിറ്റൽ മുണ്ടക്കയം എന്നിവിടങ്ങളില് സേവനമനുഷ്ഠിച്ചു. കട്ടപ്പന, കമ്പംമെട്ട്, ആനിക്കാട്, വെച്ചൂച്ചിറ, പ്രൊവിന്ഷ്യല് ഹൗസ് എന്നീ മഠങ്ങളിലും സേവനമനുഷ്ടിച്ചിട്ടണ്ട്. ഏക സഹോദരന് പുളിമൂട്ടിൽ സെബാസ്റ്റ്യൻ (ജോയി, വലിയതോവാള).
ചരമം : വെളുത്തേടത്തുപ്പറമ്പിൽ തങ്കമ്മ രാഘവൻ(83)
കാഞ്ഞിരപ്പള്ളി, മുക്കാലി വെളുത്തേടത്തുപ്പറമ്പിൽ രാഘവന്റെ ഭാര്യ തങ്കമ്മ രാഘവൻ (83)നിര്യാതയായി.സംസ്ക്കാരം ഉച്ചകഴിഞ്ഞ് 3P.M വീട്ടുവളപ്പിൽ. മക്കൾ :മോഹനൻ, സജി, ഷിജു, പത്മിനി, ഷീബ.
മരുമക്കൾ :സുമ മോഹനൻ,സാനിത സജി, സിനി ഷിജു, സോമൻ , പ്രകാശ്.
കുളങ്ങരമുറിയിൽ ടോമി ഫിലിപ്പ് (തോമാച്ചൻ – 68, റിട്ട: എൻജിനിയർ , കുവൈറ്റ്)
കാഞ്ഞിരപ്പള്ളി: വാളക്കയം കുളങ്ങരമുറിയിൽ ടോമി ഫിലിപ്പ് (തോമാച്ചൻ – 68, റിട്ട: എൻജിനിയർ, കുവൈറ്റ്) നിര്യാതനായി. സംസ്കാരം (09-06-2025, തിങ്കള്) ഉച്ചകഴിഞ്ഞ് 02.00 ന് ചിറക്കടവ് താമരക്കുന്ന് സെന്റ് എഫ്രേംസ് പള്ളി സെമിത്തേരിയില്. ഭാര്യ പരേതയായ ലളിത സി. ടോമി മുണ്ടക്കയം പൈങ്ങന ചേരാംപേരില് കുടുംബാംഗം.
മക്കള്: റോബിന് ടോമി (എക്സിക്യൂട്ടീവ് ഡയറക്ടര്, കേരള ഡെവലപ്മെന്റ് ആന്ഡ് ഇന്നോവേഷന് സ്ട്രാറ്റജിക് കൗണ്സില് & ഇന്നോവേഷന് ഹെഡ്, ടാറ്റ കണ്സള്ട്ടന്സി സര്വീസസ്), രാഖി ടോമി (എന്ജിനിയര്, ഐബിഎസ് സോഫ്ട്വെയര്, എറണാകുളം).
മരുമക്കള്: സ്മിത റോസ്മേരി ജോര്ജ് പുളിക്കല്, കഞ്ഞിക്കുഴി (സിഇഒ, പുനര്ജീവ ടെക്നോളജി സൊല്യൂഷന്സ്, എറണാകുളം), ജെയ്സണ് മാനുവല് വലിയപറമ്പില് പുളിക്കാപ്പുള്ളി, എറണാകുളം (സൈറ്റ് എന്ജിനിയര്, ഇന്സ്ട്രമെന്റേഷന്, തായ്ലന്ഡ്).
മൃതദേഹം തിങ്കൾ രാവിലെ 09:30 ന് ഭവനത്തില് കൊണ്ടുവരുന്നതാണ്.
ചരമം : അരീപ്പറമ്പിൽ ചാക്കോ വർക്കി (കുഞ്ഞൂഞ്ഞ് കുട്ടി – 93)
കണമല : പമ്പാവാലി അരീപ്പറമ്പിൽ ചാക്കോ വർക്കി (കുഞ്ഞൂഞ്ഞ് കുട്ടി – 93) നിര്യാതനായി . സംസ്കാരം പത്തിന് ചൊവ്വാഴ്ച രാവിലെ 11 ന് വീട്ടിൽ പ്രാർത്ഥന ശുഷ്രൂഷകൾ ആരംഭിച്ച ശേഷം ഉച്ചക്ക് ഒന്നിന് മുക്കൂട്ടുതറ പ്രപ്പോസ് സെന്റ് ഇഗ്നാത്തിയോസ് യാക്കോബായ പള്ളി സെമിത്തേരിയിൽ. ഭാര്യ പരേതയായ തങ്കമ്മ വർക്കി.
മക്കൾ : സാലി, ലില്ലി, മിനി, രാജൻ , ബിജു.
മരുമക്കൾ : തോമസ് ജോസഫ്, കൊച്ചുമോൾ , ഷേർലി. പരേതരായ ജോയി, പി ടി ജോസഫ്.