മാപത്തൊൺ : കേരള സംസ്ഥാനതല പുരസ്കാരം അമൽജ്യോതി എഞ്ചിനീയറിംഗ് കോളേജിന്….
കാഞ്ഞിരപ്പള്ളി : സംസ്ഥാന സർക്കാരിന്റെ പൊതുജനപങ്കാളിത്തത്തോടെയുള്ള ഭൂപട നിർമ്മാണ പദ്ധതിയായ മപത്തൊണുമായി ബന്ധപ്പെട്ട്‌ എഞ്ചിനീയറിംഗ് വിദ്യാർഥികൾക്കും കോളേജുകൾക്കുമായി ഏർപ്പെടുത്തിയ അവാർഡുകൾ പ്രഖ്യാപിച്ചു. സംസ്ഥാന തലത്തിൽ മികച്ച പ്രകടനം കാഴ്ചവച്ച അഞ്ചു കോളജുകളിൽ ഒന്ന് അമൽ ജ്യോതി കോളേജ് ഓഫ് എഞ്ചിനീയറിങ്ങാണ് . വിദ്യാർത്ഥികൾക്കുള്ള അവാർഡുകളിൽ അമിതാ കെ ബിജു ( അമൽ ജ്യോതി കോളേജ് ഓഫ് എഞ്ചിനീയറിങ്) തിരഞ്ഞെടുക്കപ്പെട്ടു. നിരവധി മാസങ്ങളിലെ പ്രവർത്തനങ്ങൾ വിലയിരുത്തിയശേഷമെന്ന് സർക്കാർ അവാർഡ് പ്രഖ്യാപിച്ചത് .
നക്ഷ 2021 എന്ന ദേശീയ ഓപ്പൺ സ്ട്രീറ്റ് മാപ്പ് ശില്പശാലയുടെ ഉദ്‌ഘാടനത്തോട് അനുബന്ധിച്ചു നടന്ന അവാർഡ് പ്രഖാപന ചടങ്ങിൽ സംസ്ഥാന IT മിഷൻ ഡയറക്ടർ Dr. S ചിത്ര IAS അവാർഡുകൾ പ്രഖ്യാപിച്ചു. അടിസ്ഥാന വികസനം, ദുരന്തനിവാരണം, ഗതാഗത സംവിധാനവികസനം മുതലായ കാര്യങ്ങൾക്കു ഉപയോഗിക്കാൻ സാധിക്കുന്ന ഭൂപട നിർമ്മാണത്തിന് കേരള IT മിഷനും അബ്ദുൾ കലാം ടെക്നോളജിക്കൽ യൂണിവേഴ്സിറ്റി എൻ എസ് എസ് സെല്ലുമായി ചേർന്ന് നടത്തിയ പ്രവർത്തനങ്ങളാണ് അവാർഡിനായി പരിഗണിച്ചത്.
എൻ എസ് എസ് പ്രോഗ്രാം ഓഫീസർമാരായ ഡോ. തോമസുകുട്ടി ജോസിന്റെയും പ്രൊഫ. വി ശ്രീരാഗിന്റെയും നേതൃത്വത്തിലാണ് കോളേജിന് ഈ സ്തുത്യർഹമായ നേട്ടം കൈവരിക്കാൻ സാധിച്ചത്.