സ്വതന്ത്രർക്കായി 189 ചിഹ്നങ്ങൾ റെഡി

ഇഞ്ചിയും പച്ചമുളകും ഉൾപ്പെടെ സ്വതന്ത്രർക്കായി തിരഞ്ഞെടുപ്പുചിഹ്നങ്ങളെത്തി. 189 ചിഹ്നങ്ങളാണ് സ്വതന്ത്ര സ്ഥാനാർഥികൾക്ക് തിരഞ്ഞെടുക്കാനുള്ളത്.

കഷ്‌ണങ്ങളാക്കിയ റൊട്ടിയും കൊട്ടയിൽവെച്ച പഴങ്ങളും ഒരുകഷ്ണം മുറിച്ചെടുത്ത കേക്കും മുന്തിരിങ്ങക്കുലയും ഐസ്‌ക്രീമും ഇതിലുണ്ട്. ഇഞ്ചി, പച്ചമുളക്, ചക്ക എന്നിങ്ങനെ പച്ചക്കറികളും ഇതിനൊപ്പം ചേർക്കാൻ പാകത്തിൽ മുറിച്ച തേങ്ങയും ചിഹ്നപ്പട്ടികയിലുണ്ട്. ഇവയെല്ലാം കേടുകൂടാതെ സൂക്ഷിക്കാൻ ഫ്രിഡ്ജും വാതിൽതുറന്നുണ്ട്.

വീടുകൾ മറന്നുതുടങ്ങിയ തിരികല്ല്, ആട്ടുകല്ല്, ചായയരിപ്പമുതൽ കുടവും കുക്കറുംവരെ ചിഹ്നങ്ങൾ. സംഗീതാസ്വദകരെ ട്യൂൺചെയ്യാൻ ഹാർമോണിയം, ഗ്രാമഫോൺ, ഓടക്കുഴൽ, സിത്താർ, വയലിൻ, ട്രംപറ്റ് വരെ ചിഹ്നങ്ങൾ.

അറക്കവാൾ, കട്ടിങ് പ്ലയർ, ഡ്രിൽ മെഷീൻ, നഖംവെട്ടി, പെൻസിൽ കട്ടർ, കൊലശേരി, കത്രിക, സ്റ്റേപ്ലർ, സ്പാനർ തുടങ്ങിയ ആയുധങ്ങളും തിരഞ്ഞെടുക്കാം. വള, നെക്ലേസ്, കമ്മൽ, മോതിരം, വജ്രം തുടങ്ങി ആഭരണപ്രിയർക്കും ഇഷ്ടയിനങ്ങളുണ്ട്. ഓട്ടോറിക്ഷ, ക്രെയിൻ, ട്രാക്ടർ, ട്രക്ക്, വീൽബാരോ, ഹെലികോപ്റ്റർ, ടയറുകൾ തുടങ്ങിയവ വാഹനപ്രിയരെ ആകർഷിക്കുന്നു.