പൊതുജനങ്ങൾക്കു കോവിഡ് വാക്സിൻ വിതരണം ആരംഭിക്കുന്നു ; കാഞ്ഞിരപ്പള്ളി ജനറൽ ആശുപത്രിയിൽ നിന്നും കോവിഡ് വാക്സിൻ സൗജന്യമായി ലഭിക്കും.
കോട്ടയം ജില്ലയിൽ പൊതുജനങ്ങൾക്ക് കോവിഡ് വാക്സിൻ വിതരണം ഇന്ന് ആരംഭിക്കും. ആദ്യഘട്ടത്തിൽ 60 വയസിന് മുകളിൽ പ്രായമുള്ളവർക്കും 45 – 60 പ്രായപരിധിയിൽ ഗുരുതര ആരോഗ്യപ്രശ്നങ്ങൾ നേരിടുന്നവർക്കുമാണ് പ്രതിരോധ കുത്തിവയ്പ്പ് നൽകുന്നത്. ആദ്യദിവസങ്ങളിൽ ജില്ലയിലെ സർക്കാർ ആരോഗ്യ കേന്ദ്രങ്ങളിൽ കുത്തിവയ്പ്പ് സൗജന്യമായി ലഭിക്കും. കാഞ്ഞിരപ്പള്ളി ജനറൽ ആശുപത്രിയിൽ നിന്നും കോവിഡ് വാക്സിൻ സൗജന്യമായി ലഭിക്കും.
നിലവിൽ വാക്സിൻ വിതരണ കേന്ദ്രങ്ങളിൽ നേരിട്ടെത്തി രജിസ്റ്റർ ചെയ്യാൻ ക്രമീകരണം ഏർപ്പെടുത്തിയിട്ടില്ല. വാക്സിൻ ലഭിക്കാൻ ഇന്നു രാവിലെ ഒന്പതു മുതൽ cowin.gov.in എന്ന പോർട്ടലിൽ രജിസ്റ്റർ ചെയ്യാം.
= ഇതിനായി ആദ്യം മൊബൈൽ നന്പർ എന്‍റർ ചെയ്യണം.
=തുടർന്ന് ഈ മൊബൈൽ നന്പറിൽ ലഭിക്കുന്ന ഒടിപി ഉപയോഗിച്ച് രജിസ്ട്രേഷൻ നടത്താം.
=ഒരു മൊബൈൽ നന്പർ ഉപയോഗിച്ച് നാലുപേരുടെ വരെ രജിസ്ട്രേഷൻ നടത്താം.
=വാക്സിൻ സ്വീകരിക്കേണ്ടവരുടെ പേര്, പ്രായം, തിരിച്ചറിയൽ രേഖയുടെ വിവരങ്ങൾ തുടങ്ങിയ വിവരങ്ങൾ എന്‍റർ ചെയ്യണം.
=45 – 60 പ്രായപരിധിയിലുള്ള ആളാണെങ്കിൽ നിലവിൽ നേരിടുന്ന ഗുരുതര ആരോഗ്യ പ്രശ്നം എന്തെന്ന് വ്യക്തമാക്കണം. ഇതിനായി പോർട്ടലിൽ തന്നെയുള്ള രോഗങ്ങളുടെ പട്ടികയിൽ ബാധകമായത് സെലക്ട് ചെയ്താൽ മതിയാകും.
=രജിസ്ട്രേഷൻ ഉള്ള ഏതെങ്കിലും ഒരു ഡോക്ടറുടെ പക്കൽനിന്നും നിശ്ചിത മാതൃകയിലുള്ള മെഡിക്കൽ സർട്ടിഫിക്കറ്റ് വാങ്ങണം. സർട്ടിഫിക്കറ്റിന്‍റെ മാതൃക പോർട്ടലിൽ ലഭിക്കും.
=സംസ്ഥാനം, ജില്ല എന്നിവ തെരഞ്ഞെടുത്താൽ വാക്സിൻ ലഭിക്കുന്ന കേന്ദ്രവും തീയതിയും തെരഞ്ഞെടുക്കാൻ സാധിക്കും.
=60 വയസിന് മുകളിൽ പ്രായമുള്ളവർ രജിസ്റ്റർ ചെയ്യുന്പോൾ നൽകിയ തിരിച്ചറിയൽ രേഖയുമായി ആണ് വാക്സിൻ സ്വീകരിക്കാൻ എത്തേണ്ടത്.
=45 – 60 പ്രായപരിധിയിൽ ഉള്ളവർ തിരിച്ചറിയൽ രേഖയ്ക്കൊപ്പം മെഡിക്കൽ സർട്ടിഫിക്കറ്റും ഹാജരാക്കണം.