രാഹുൽഗാന്ധി ചൊവ്വാഴ്ച പൊൻകുന്നത്ത്.. ഉജ്ജ്വല വരവേൽപ്പ്‌ നൽകാനുള്ള ഒരുക്കങ്ങൾ പൂർത്തിയായി
പൊൻകുന്നം : : ചൊവ്വാഴ്ച കാഞ്ഞിരപ്പള്ളി നിയോജകമണ്ഡലത്തിലെ യുഡിഎഫ് സ്ഥാനാർത്ഥി ജോസഫ് വാഴയ്ക്കന്റെ തിരഞ്ഞെടുപ്പ് പ്രചാരണത്തിനായി മുൻ കോൺഗ്രസ് പ്രസിഡന്റ് രാഹുൽഗാന്ധി പൊൻകുന്നത്ത് എത്തും. ഒരുമണിക്ക് എത്തുന്ന രാഹുൽ ഗാന്ധി തുടർന്ന് പാലായിലേക്ക് പോകും. പൊൻകുന്നത്ത് രാഹുൽ ഗാന്ധിക്ക് ഉജ്ജ്വല വരവേൽപ്പ്‌ നൽകാനുള്ള ഒരുക്കങ്ങൾ പൂർത്തിയായതായി മണ്ഡലം പ്രസിഡന്റ് റോണി കെ ബേബി അറിയിച്ചു.
ചൊവ്വാഴ്ച രാവിലെ 11-ന് ചിങ്ങവനത്ത് നിന്ന്‌ പരുത്തുംപാറയിലെത്തി പൊതുസമ്മേളനത്തിൽ അദ്ദേഹം പങ്കെടുക്കും. തുടർന്ന് ചോഴിയക്കാട്, പാറയ്ക്കൽകടവ്, പുതുപ്പള്ളി വഴി 12 മണിക്ക്‌ മണർകാട് എത്തുന്ന രാഹുൽഗാന്ധി മണർകാട് കവലയിൽ ഉമ്മൻചാണ്ടിയുടെ തിരഞ്ഞെടുപ്പ് യോഗത്തിൽ പ്രസംഗിക്കും. അവിടെനിന്ന്‌ കൊടുങ്ങൂര് വഴി ഒരുമണിക്ക് പൊൻകുന്നത്തെത്തി കാഞ്ഞിരപ്പള്ളി നിയോജകമണ്ഡലത്തിൽ ജോസഫ് വാഴയ്ക്കന് വേണ്ടി പ്രചാരണം നടത്തും. പിന്നീട് പൈക വഴി പാലായിൽ എത്തി രണ്ടിന്‌ മാണി സി.കാപ്പന്റെ തിരഞ്ഞെടുപ്പ് യോഗത്തിൽ പങ്കെടുക്കും. തുടർന്ന് മരങ്ങാട്ടുപള്ളി വഴി മൂന്നിന്‌ ഉഴവൂരിലെത്തി മോൻസ് ജോസഫിന്റെ തിരഞ്ഞെടുപ്പ് യോഗത്തിൽ പ്രസംഗിക്കും.