പൊൻകുന്നത്ത് ബസുകള്‍ കൂട്ടിയിടിച്ച് നാലുപേര്‍ക്ക് പരിക്ക്
പൊൻകുന്നം : ദേശീയ പാത 183ല്‍ പൊൻകുന്നം 19-ാം മൈലില്‍ കൊടുവളവില്‍ സ്വകാര്യ ബസുകള്‍ കൂട്ടിയിടിച്ച് നാലുപേര്‍ക്ക് പരിക്ക്.
ഞായറാഴ്ച വൈകിട്ട് അഞ്ചോടെയായിരുന്നു അപകടം. സ്വകാര്യ ബസ് ഡ്രൈവര്‍മാരായ അഖില്‍ (28), രാജു, യാത്രക്കാരായ പാമ്പാടി സ്വദേശിനി അനിത (45), സിന്ധു എന്നിവര്‍ക്കാണ് പരിക്കേറ്റത്. സാരമായി പരിക്കേറ്റ അഖിലിനെ മെഡിക്കല്‍ കോളജ് ആശുപത്രിയില്‍ പ്രവേശിപ്പിച്ചു. രാജുവിനെ കാഞ്ഞിരപ്പള്ളി ജനറല്‍ ആശുപത്രിയിലും മറ്റുള്ളവരെ പൊന്‍കുന്നത്തെ സ്വകാര്യ ആശുപത്രിയിലും പ്രവേശിപ്പിച്ചു.
ചങ്ങനാശ്ശേരിയില്‍ നിന്ന് മുണ്ടക്കയത്തേക്ക് പോയ ബസും പൊന്‍കുന്നത്ത് നിന്ന് കോട്ടയത്തേക്ക് പോയ ബസും തമ്മിലാണ് കൂട്ടിയിടിച്ചത്. അപകടത്തെ തുടര്‍ന്ന ദേശീയ പാതയില്‍ ഗതാഗതം തടസ്സപ്പെട്ടു. കാഞ്ഞിരപ്പള്ളിയില്‍ നിന്നും അഗ്നിശമന സേന സ്ഥലത്തെത്തി ബസുകള്‍ മാറ്റി ഗതാഗതം പുന:സ്ഥാപിച്ചു.
