അമ്പലപ്പുഴ സംഘം മണിമലക്കാവിലെത്തി: ആഴിപൂജ ഇന്ന്

മണിമല: എരുമേലി പേട്ടയ്ക്കും ശബരിമല ദർശനത്തിനുമായി എത്തുന്ന അമ്പലപ്പുഴ ഭക്തസംഘം മണിമലക്കാവ് ഭഗവതീ ക്ഷേത്രത്തിലെത്തി. ശനിയാഴ്ച വൈകീട്ട് സംഘം മണിമലക്കാവിൽ ആഴിപൂജ നടത്തും. നൂറ്റാണ്ടുകളായി അമ്പലപ്പുഴ സംഘം മണിമലക്കാവ് ഭഗവതീ ക്ഷേത്രത്തിലെത്തി പടുക്ക, കമ്പിളിവിരിക്കൽ, സമൂഹസദ്യ, ഭജന, സർവപ്രായശ്ചിത്തം ആഴിപൂജ, പ്രസാദ വിതരണം എന്നിവ നടത്തിയാണ് പേട്ടതുള്ളലിനായി പോകുന്നത്.

കോവിഡ് മാനദണ്ഡപ്രകാരം ഇത്തവണ സമൂഹസദ്യയും പ്രസാദ വിതരണവും ഒഴിവാക്കിയിട്ടുണ്ട്.നാനൂറിലധികം അംഗങ്ങൾ എത്തിയിരുന്ന സംഘത്തിൽ കോവിഡ് കാലമായതിനാൽ 50 സ്വാമിമാർ മാത്രമാണ് സംഘത്തിലുള്ളത്. സമൂഹപ്പെരിയോൻ കളത്തിൽ ചന്ദ്രശേഖരൻ നായർ ഇത്തവണ എത്തിയില്ല സമൂഹപ്പെരിയോന്റെ പ്രതിനിധിയായി അമ്പലപ്പുഴ കരപ്പെരിയോൻ സംഘത്തിലെ മുതിർന്നയംഗമായ എൻ.ഗോപാലകൃഷ്ണപിള്ളയാണ് ചടങ്ങുകൾക്ക് കാർമികത്വം വഹിക്കുക.