മേജർ ആർച്ചുബിഷപ് കർദിനാൾ മാർ ജോർജ് ആലഞ്ചേരി വിരമിച്ചു ; കൂരിയമെത്രാൻ കാഞ്ഞിരപ്പള്ളി രൂപതാംഗം മാർ സെബാസ്റ്റ്യൻ വാണിയപ്പുരയ്ക്കൽ സീറോമലബാർസഭയുടെ അഡ്മിനിസ്ട്രേറ്ററായി പ്രവർത്തിക്കും.
സീറോമലബാർസഭയുടെ മൂന്നാമത്തെ മേജർ ആർച്ചുബിഷപ് കർദിനാൾ മാർ ജോർജ് ആലഞ്ചേരി മേജർ ആർച്ചുബിഷപ് സ്ഥാനത്തു നിന്നു വിരമിച്ചു. സീറോമലബാർസഭയിൽ വർധിച്ചുവരുന്ന അജപാലന ആവശ്യങ്ങളും തന്റെ ആരോഗ്യ സ്ഥിതിയും പരിഗണിച്ചു മേജർ ആർച്ചുബിഷപ്പിന്റെ ഉത്തരവാദിത്വത്തിൽ നിന്നും വിരമിക്കാനുള്ള ആഗ്രഹം പ്രകടിപ്പിച്ചുകൊണ്ട് കർദിനാൾ മാർ ആലഞ്ചേരി സമർപ്പിച്ച രാജി പരിശുദ്ധ പിതാവ് ഫ്രാൻസിസ് മാർപാപ്പ സ്വീകരിച്ചു. പൗരസ്ത്യ സഭാ നിയമം, കാനൻ 127 പ്രകാരം പുതിയ മേജർ ആർച്ചുബിഷപ് സ്ഥാനം ഏറ്റെടുക്കുന്നതുവരെ കൂരിയമെത്രാൻ മാർ സെബാസ്റ്റ്യൻ വാണിയപ്പുരയ്ക്കൽ സീറോമലബാർസഭയുടെ അഡ്മിനിസ്ട്രേറ്ററായി പ്രവർത്തിക്കും.
വാണിയപ്പുരയ്ക്കൽ വി.എം.തോമസിന്റെയും എലിയാമ്മയുടെയും എട്ടാമത്തെ മകനായി 1967 മാർച്ച് 29ന് ജനിച്ചു.കാഞ്ഞിരപ്പള്ളി രൂപതയിലെ നിർമ്മലഗിരി ഇടവകയാണ് അദ്ദേഹം. മുണ്ടക്കയം സെന്റ് ലൂയിസ് എൽപി സ്കൂൾ, പെരുവന്താനം സെന്റ് ജോസഫ് ഹൈസ്കൂൾ എന്നിവിടങ്ങളിൽ നിന്ന് സ്കൂൾ വിദ്യാഭ്യാസം പൂർത്തിയാക്കിയ അദ്ദേഹം 1982-ൽ വൈദിക രൂപീകരണത്തിനായി പൊടിമറ്റം മേരിമാതാ മൈനർ സെമിനാരിയിൽ ചേർന്നു. വടവാതൂർ സെന്റ് തോമസ് അപ്പസ്‌തോലിക് സെമിനാരിയിലാണ് അദ്ദേഹം തത്ത്വശാസ്ത്രപരവും ദൈവശാസ്ത്രപരവുമായ പഠനം നടത്തിയത്. 1992 ഡിസംബർ 30-ന് ബിഷപ്പ് മാത്യു വട്ടക്കുഴിയിൽ നിന്ന് വൈദിക പട്ടം സ്വീകരിച്ചു.
സ്ഥാനാരോഹണത്തിനുശേഷം കട്ടപ്പന സെന്റ് ജോർജ് ഫൊറാന പള്ളിയിൽ അസിസ്റ്റന്റ് ഇടവക വികാരിയായി സേവനമനുഷ്ഠിച്ചു. 1995ൽ കാഞ്ഞിരപ്പള്ളി യുവദീപ്തി ഡയറക്ടറായി നിയമിതനായി. 2000-ൽ റോമിൽ ഉപരിപഠനത്തിന് അയക്കപ്പെട്ട അദ്ദേഹം റോമിലെ ഹോളി ക്രോസ് യൂണിവേഴ്സിറ്റിയിൽ നിന്ന് കാനോൻ നിയമത്തിൽ ഡോക്ടറേറ്റ് നേടി. തിരിച്ചെത്തിയ ശേഷം അദ്ദേഹം രൂപതാ ജുഡീഷ്യൽ വികാരിയായും കൊരട്ടി, പൂമറ്റം, ചേന്നാക്കുന്ന്, മുളംകുന്ന് ഇടവക വികാരിയായും കാക്കനാട് സീറോ മലബാർ മേജർ ആർക്കി എപ്പിസ്‌കോപ്പൽ ട്രിബ്യൂണലിൽ ബോണ്ട് ഡിഫൻഡറായും സേവനമനുഷ്ഠിച്ചു.
കപ്പാട് ബെനഡിക്റ്റൈൻ ആശ്രമം, കുന്നോത്ത് ഗുഡ് ഷെപ്പേർഡ് മേജർ സെമിനാരി, പൊടിമറ്റം നിർമ്മല തിയോളജിക്കൽ കോളേജ് എന്നിവിടങ്ങളിൽ അദ്ധ്യാപകനായിരുന്നു. 2014-ൽ സീറോ മലബാർ സഭയുടെ മേജർ ആർക്കി എപ്പിസ്‌കോപ്പൽ കൂരിയ വൈസ് ചാൻസലറായി ഫാ. വാണിയപ്പുരക്കൽ നിയമിതനായി. മൗണ്ട് സെന്റ് തോമസിലെ വൈസ് ചാൻസലറുടെ ഓഫീസിൽ സേവനമനുഷ്ഠിക്കവേയാണ് സീറോ മലബാർ സഭയുടെ കൂരിയ ബിഷപ്പായി തിരഞ്ഞെടുക്കപ്പെട്ടത്. കാഞ്ഞിരപ്പള്ളി സെന്റ് ഡൊമിനിക് കത്തീഡ്രലിൽ മേജർ ആർച്ച് ബിഷപ്പ് കർദിനാൾ ജോർജ് ആലഞ്ചേരിയുടെ അധ്യക്ഷതയിൽ 2017 നവംബർ 12-നായിരുന്നു എപ്പിസ്‌കോപ്പൽ സ്ഥാനാരോഹണം. ട്രോയ്‌നയിലെ ബിഷപ്പ് കൂടിയാണ് അദ്ദേഹം. മലയാളം കൂടാതെ ഇംഗ്ലീഷ്, ഇറ്റാലിയൻ, ജർമ്മൻ ഭാഷകളിലും ബിഷപ്പ് സെബാസ്റ്റ്യൻ പ്രാവീണ്യം നേടിയിട്ടുണ്ട്.
ബിഷപ്പ് സെബാസ്റ്റ്യൻ വാണിയപ്പുരയ്ക്കൽ സീറോ മലബാർ സഭയുടെ രണ്ടാമത്തെ കൂരിയ ബിഷപ്പാണ്. ആദ്യത്തെ കൂരിയാ ബിഷപ്പായിരുന്ന ബിഷപ് ബോസ്‌കോ പുത്തൂരിനെ ഓസ്‌ട്രേലിയയിലെ മെൽബണിൽ പുതുതായി സ്ഥാപിച്ച സെന്റ് തോമസ് സീറോ മലബാർ എപ്പാർക്കിയിലേക്ക് സ്ഥലം മാറ്റിയ 2014 മുതൽ ആ പദവി ഒഴിഞ്ഞുകിടക്കുകയായിരുന്നു.
മാർ സെബാസ്റ്റ്യൻ വാണിയപ്പുരയ്ക്കൽ, സീറോ മലബാർ സഭയുടെ കൂരിയ ബിഷപ്പ് എന്നതിലുപരി, ടീച്ചേഴ്‌സ് ബാങ്കിന്റെ സെർച്ച് കമ്മിറ്റി ചെയർമാനുമാണ് (അവിടെ നിന്ന് സിനഡൽ മേജർ സെമിനാരികളിലേക്ക് അധ്യാപകരെയും ഫോർമാറ്റർമാരെയും നിയമിക്കുന്നു), കമ്മീഷനിലെ എപ്പിസ്‌കോപ്പൽ അംഗമാണ്. സീറോ മലബാർ ദളിത് വികാസ് സൊസൈറ്റിയുടെ (SDVS) പ്രസിഡന്റും. എസ്‌സി/എസ്‌ടി/ബിസി കമ്മീഷൻ വൈസ് ചെയർമാൻ, ടെമ്പറൻസ് കമ്മീഷൻ വൈസ് ചെയർമാൻ എന്നീ നിലകളിൽ അദ്ദേഹം കേരള കാത്തലിക് ബിഷപ്പ് കൗൺസിലിൽ സേവനമനുഷ്ഠിക്കുന്നു