ചോറ്റിയിൽ നിയന്ത്രണം വിട്ട കാർ മരത്തിൽ ഇടിച്ചുതകർന്നു..; മൂന്ന് പേർക്ക് പരിക്കേറ്റു

മുണ്ടക്കയം : ദേശീയപാതയിൽ ചോറ്റിക്കും, ചിറ്റടിക്കുമിടയിൽ വച്ചുണ്ടായ വാഹനാപകടത്തിൽ മൂന്ന് പേർക്ക് പരിക്കേറ്റു. ഞായറാഴ്ച വെളുപ്പിന് രണ്ടു മണിയോടുകൂടി ആയിരുന്നു അപകടം. എറണാകുളത്തു നിന്നും, പരുന്തുംപായിലേക്ക് റ പോയ ടാറ്റ ഹെഡ്സ കാറാണ് അപകടത്തിൽപ്പെട്ടത്. നിയന്ത്രണം വിട്ട കാർ റോഡിന് സമീപത്തെ മരത്തിൽ ഇടിക്കുകയായിരുന്നു. അപകടത്തിൽ വാഹനം പൂർണമായും തകർന്നു.ഓട്ടത്തിനിടയിൽ ഡ്രൈവർ മയങ്ങി പോയതായിരിക്കും അപകടകാരണം എന്ന് അനുമാനിക്കുന്നു.

കാഞ്ഞിരപ്പള്ളിയിൽ നിന്നും ഫയർഫോഴ്സും, മുണ്ടക്കയത്തു നിന്നും പോലീസും എത്തിയാണ് അപകടത്തിൽപ്പെട്ടവരെ ആശുപത്രിയിൽ എത്തിച്ചത്. വാഹനത്തിൽ ഏഴ് പേരാണ് ഉണ്ടായിരുന്നത്. മൂന്ന് പേർക്ക് സാരമായ പരിക്കേറ്റു. ഇവരെ കാഞ്ഞിരപ്പള്ളിയിലെ സ്വകാര്യ ആശുപത്രിയിലും താലൂക്ക് ആശുപത്രിയിലും പ്രവേശിപ്പിച്ചു. ഗുരുതരമായി പരിക്കേറ്റ ഡ്രൈവറെ എറണാകുളം മെഡിസിറ്റി ആശുപത്രിയിൽ പ്രവേശിപ്പിച്ചു.