മുപ്പതുലിറ്റർ ചാരായം കാറിൽ കടത്തവേ പിടിയിലായി; ഒരാൾ അറസ്റ്റിൽ
പൊൻകുന്നം: മുപ്പതുലിറ്റർ ചാരായം കാറിൽ കടത്തിയ കൊല്ലമുള നാറാണം തോട് തുലാപ്പള്ളി ഇടപ്പറമ്പിൽ സജികുമാറി(50)നെ പൊൻകുന്നം പോലീസ് അറസ്റ്റ് ചെയ്തു. ഡിവൈ.എസ്.പി.എൻ.സി.രാജ്‌മോഹന് ലഭിച്ച വിവരത്തെ തുടർന്ന് സ്റ്റേഷൻ ഹൗസ് ഓഫീസർ കെ.വിനോദിന്റെ നേതൃത്വത്തിലുള്ള സംഘമാണ് അറസ്റ്റ് ചെയ്തത്. എരുമേലി പോലീസിന്റെ ഹൈടെക്ക് ക്യാമറയിൽ പതിഞ്ഞ ചാരായം കടത്തിയ കാറിന്റെ ദൃശ്യങ്ങൾ പൊൻകുന്നം പോലീസിന് കൈമാറുകയായിരുന്നു.
അറസ്റ്റിലായ സജികുമാറിൽ നിന്നും കിട്ടിയ വിവരമനുസരിച്ച് അയൽവാസി അജികുമാറിന്റെ വീട്ടിൽ നിന്ന് 150 ലിറ്റർ കോടയും വാറ്റുപകരണങ്ങളും പിടികൂടി. ഇയാളെ അറസ്റ്റ് ചെയ്തിട്ടില്ല.
പ്രിൻസിപ്പൽ എസ്.ഐ. രാജേഷ്, എസ്.ഐ.മാരായ കെ.ആർ.റെജിലാൽ, രവീന്ദ്രനാചാരി, എ.എസ്.ഐ.മാരായ വിക്രമൻ, ഗിരീഷ്, സീനിയർ സി.പി.ഒ.മാരായ ജോഷി, ബിനുമോൾ, ഷൈമാബീഗം, പ്രതാപചന്ദ്രൻ, നാർക്കോട്ടിക് സെൽ ഡിവൈ.എസ്.പി. ബി.അനിൽകുമാറിന്റെ കീഴിലുള്ള DANSAF ടീം അംഗങ്ങളായ പ്രതീഷ് രാജ്, ശ്രീജിത്ത് ബി.നായർ, തോംസൺ കെ.മാത്യു, അജയകുമാർ, വി.കെ.അനീഷ്, എസ്.അരുൺ, ഷെമീർ സമദ്, പി.എം.ഷിബു, സതീഷ്, അനീഷ് കെ എൻ എന്നിവർ അന്വേഷണ സംഘത്തിലുണ്ടായിരുന്നു.