കാഞ്ഞിരപ്പള്ളി പഞ്ചായത്തില്‍ അധിക നിയന്ത്രണം ഏര്‍പ്പെടുത്തിയതോടെ ടൗൺ നിശ്ചലമായി
കാഞ്ഞിരപ്പള്ളി: കാഞ്ഞിരപ്പള്ളി പഞ്ചായത്തില്‍ അധിക നിയന്ത്രണം ഏര്‍പ്പെടുത്തിയതോടെ ടൗൺ നിശ്ചലമായി. മെഡിക്കല്‍ സ്റ്റോറുകള്‍ മാത്രമാണ് തുറന്നു പ്രവര്‍ത്തിച്ചത്.
പഞ്ചായത്തിലെ അതിര്‍ത്തി റോഡുകള്‍ അടച്ച് പോലീസ് കാവല്‍ ഏര്‍പ്പെടുത്തിയിരുന്നു. കടകള്‍ തുറന്ന് പ്രവര്‍ത്തിച്ചിരുന്നതിനാല്‍ കൂടുതല്‍ പേര്‍ അനാവശ്യമായി പുറത്തിറങ്ങുന്നത് ശ്രദ്ധയില്‍പ്പെട്ടതോടെയാണ് പഞ്ചായത്തും പോലീസും ചേര്‍ന്ന് നിയന്ത്രണം ഏര്‍പ്പെടുത്തിയത്. ബുധന്‍, ശനി ദിവസങ്ങളില്‍ രാവിലെ എട്ടു മുതല്‍ വൈകുന്നേരം നാലു വരെയാണു കടകള്‍ പ്രവര്‍ത്തിക്കുക. രണ്ടാഴ്ചത്തേക്കാണ് പഞ്ചായത്തില്‍ നിയന്ത്രണം ഏര്‍പ്പെടുത്തിയിരിക്കുന്നത്. കടകള്‍ തുറക്കുന്ന ദിവസങ്ങളില്‍ പട്ടണത്തിലേക്ക് ആളുകള്‍ ഇറങ്ങുന്നത് ഒഴിവാക്കണമെന്ന് അധികൃതര്‍ അറിയിച്ചു. വീടിന് തൊട്ടടുത്തുള്ള കടകളെയും ഹോം ഡെലിവറി സംവിധാനങ്ങളും പ്രയോജനപ്പെടുത്തണമെന്നും അധികൃതര്‍ അറിയിച്ചു.