വ്യാപാര സ്ഥാപനങ്ങൾ തുറന്നു പ്രവർത്തിക്കുവാൻ അനുവദിക്കണം എന്നാവശ്യപ്പെട്ട് ഇന്നുകോട്ടയം ജില്ലയിലെ വ്യാപാര സ്ഥാപനങ്ങൾ അടച്ചിടും
വ്യാപാരി വ്യവസായി ഏകോപന സമിതി ജില്ലാ കമ്മിറ്റിയുടെ നിർദേശം അനുസരിച്ച് ഇന്നു ജില്ലയിലെ എല്ലാ വ്യാപാര സ്ഥാപനങ്ങളും അടച്ചിടും. രാവിലെ 11 മുതൽ യൂണിറ്റ് ഭാരവാഹികളുടെ നേതൃത്വത്തിൽ അതാതു യൂണിറ്റുകളുടെ പരിധിയിലുള്ള സർക്കാർ ഓഫീസുകൾ, പഞ്ചായത്ത്, മുനിസിപ്പൽ ഓഫീസുകൾക്ക് മുന്പിൽ ധർണ നടത്തും. കോട്ടയം കളക്‌ടറേറ്റിനു മുന്പിൽ ജനറൽ സെക്രട്ടറി എ.കെ.എൻ. പണിക്കരുടെ അധ്യക്ഷതയിൽ നടത്തുന്ന ധർണ സംസ്ഥാന വൈസ് പ്രസിഡന്‍റ് എം.കെ. തോമസുകുട്ടി ഉദ്ഘാടനം ചെയ്യും.
വി.സി. അബ്ദുൾ ലത്തീഫ്, വി.എ. മുജീബ് റഹ്‌മാൻ, മാത്യു ചാക്കോ വെട്ടിയാങ്കൽ, വി.സി. ജോസഫ്, കെ.ജെ. മാത്യു, ടി.കെ. രാജേന്ദ്രൻ, കെ.എ. വർഗീസ്, ഫിലിപ്പ് മാത്യു തരകൻ തുടങ്ങിയവർ പ്രസംഗിക്കും.
കോവിഡ് മാനദണ്ഡങ്ങൾ പാലിച്ച് ജില്ലയിലെ എല്ലാ വ്യാപാര സ്ഥാപനങ്ങളും സമയ ബന്ധിതമായി തുറന്നു പ്രവർത്തിക്കുവാൻ അനുവദിക്കുക. പോലീസിന്‍റെയും സെക്‌ട്രൽ മജിസ്ടേറ്റുമാരുടേയും അന്യായമായ പീഡനം അവസാനിപ്പിക്കുക, ലോക്ഡൗണ്‍ കാലത്തെ കട വാടക ഒഴിവാക്കുവാൻ സർക്കാർ നടപടി സ്വീകരിക്കുക തുടങ്ങിയ വിവിധ ആവശ്യങ്ങളുന്നയിച്ചാണ് സമരം.