എന്നു തുറക്കും കാഞ്ഞിരപ്പള്ളി ജനറൽ ആശുപത്രിയിലെ കാത്ത് ലാബ് ?

ആറുമാസം മുൻപ് , പത്തരക്കോടി രൂ​പ ചിലവിട്ട് പൂർത്തിയാക്കിയ കാ​ഞ്ഞി​ര​പ്പ​ള്ളി ജനറൽ ആശുപത്രിയിലെ കാ​ത്ത് ലാബിന്റെ പ്രവർത്തനം ഇനിയും ആരംഭിച്ചിട്ടില്ല. 2021 ഫെ​ബ്രു​വ​രി 16 ഉദ്‌ഘാടനം ചെയ്യപ്പെട്ട കാ​ത്ത് ലാബിന് ആവശ്യത്തിനുള്ള ഡോ​ക്ട​ർ​മാ​രെ​യും മറ്റ് ജീ​വ​ന​ക്കാ​രെ​യും നിയമിക്കാത്തതാണ് തടസ്സം എന്നാണറിയുന്നത്. . ചികിത്സയ്ക്കായി ഉപയോഗിക്കുന്നില്ലെങ്കിലും, എട്ടരക്കോടി രൂപ മുടക്കുള്ള യന്ത്രം കേടായി പോകാതിരിക്കുവാൻ പതിവായി പ്രവർത്തിപ്പിക്കുന്നതിന് മാത്രം മാസം ഒന്നര ലക്ഷം രൂപയോളം ചിലവുണ്ട് .

കാ​ത്ത് ലാ​ബ് പ്രവർത്തനം ആരംഭിച്ചാൽ, സ്വകാര്യ ആശുപത്രികൾ രണ്ടുലക്ഷം രൂപയോളം ചാർജ് ചെയ്യുന്ന ‌ ആ​ൻ​ജി​യോ​ഗ്രാം, ആ​ൻ​ജി​യോ​പ്ലാ​സ്റ്റി ചി​കി​ത്സ​ക​ൾ ജനറൽ ആശുപത്രിയിൽ അർഹരായവർക്ക് സൗ​ജ​ന്യ​മാ​യി ല​ഭ്യ​മാ​ക്കാ​ൻ സാധിക്കും.

കോവിഡ് അനുബന്ധ രോഗങ്ങളായി ഹൃദയസംബന്ധമായ രോഗങ്ങൾ കൂടിവരുന്ന സാഹചര്യത്തിൽ, കാ​ഞ്ഞി​ര​പ്പ​ള്ളി ജനറൽ ആശുപത്രിയിലെ കാത്ത്ലാബ് എത്രയും പെട്ടെന്ന് പ്രവർത്തനം ആരംഭിക്കുന്നതിനുള്ള നടപടികൾ സ്വീകരിക്കണമെന്നാണ് പൊതുജനങ്ങൾ ആവശ്യപ്പെടുന്നത് .