പാറത്തോട് പഞ്ചായത്തിലെ ഏറ്റവും ജനകീയനായ പ്രസിഡന്റ് ജോണിക്കുട്ടി മഠത്തിനകം രാജിവയ്ക്കുന്നു.. ഇനി ഡയസ് കോക്കാട്ട് പ്രസിഡന്റ്
പാറത്തോട്: മുന്നണി ധാരണ അനുസരിച്ച്, കാലാവധി കഴിഞ്ഞതിനാൽ പാറത്തോട് പഞ്ചായത്തിലെ ഏറ്റവും ജനകീയനും, ജനപ്രിയനുമെന്ന് പേരെടുത്ത പ്രസിഡന്റ് ജോണിക്കുട്ടി മഠത്തിനകം പ്രസിഡന്റ് സ്ഥാനം രാജിവയ്ക്കുന്നു. കേരള കോൺഗ്രസ് -എമ്മിലെ ധാരണ പ്രകാരമാണ് രാജി. അധികാരമേറ്റ് ഒരു വര്‍ഷവും രണ്ടു മാസവും പിന്നിടുമ്പോഴാണ് ജോണിക്കുട്ടി മഠത്തിനകം പ്രസിഡന്‍റുസ്ഥാനം രാജിവയ്ക്കുന്നത്.
അഞ്ചാം വാർഡംഗവും നിലവിലെ വികസനകാര്യ സ്റ്റാന്റിംഗ് കമ്മിറ്റി ചെയർമാനുമായ ഡയസ് കോക്കാട്ടാകും അടുത്ത പ്രസിഡന്റ്. മൂന്നാം തവണയാണ് ഡയസ് കോക്കാട്ട് പ്രസിഡന്റ് സ്ഥാനത്തേക്ക് എത്തുന്നത്. തുടര്‍ച്ചയായ അഞ്ചാം തവണയാണ് പഞ്ചായത്ത് അംഗമായി തുടരുന്നത്.
18 ആം വാർഡിൽ നിന്നും വിജയിച്ച് പഞ്ചായത്ത് പ്രസിഡന്റ് ആയി പ്രവർത്തിച്ച കാലയളവിൽ, ജോണിക്കുട്ടി എബ്രഹാം മഠത്തിനകം, പ്രളയം മൂലവും, കോവിഡ് മഹാമാരി മൂലവും ദുരിതത്തിലായ ജനങ്ങളെ സഹായിക്കുന്നതിൽ വളരെയേറെ ശ്രദ്ധ ചെലുത്തിയിരുന്നു. സാമുദായിക, മത, രാഷ്ട്രീയ ഭേദമെന്യേ വിവിധ സംഘടനകളെ ഏകോപിപ്പിച്ചു ജനങ്ങൾക്ക് സഹായം എത്തിക്കുന്നതിൽ അദ്ദേഹം ഏറെ വിജയിച്ചിരുന്നു. പഞ്ചായത്തിൽ മുഴുവനും കുടിവെള്ളം എത്തിക്കുന്നതിന് 73 കോടി രൂപയുടെ കുടിവെള്ള പദ്ധതി, കോഴിമാലിന്യ സംസ്കരണ കേന്ദ്രം, ഊട്ടുപാറ – വേങ്ങത്താനം ടുറിസം പദ്ധതി, ജനകീയ ഹോട്ടൽ, പ്രളയത്തിൽ തകർന്ന രണ്ടു കുടുബങ്ങൾക്ക് വീട് നിർമ്മിക്കുവാൻ കുടുബശ്രീയുടെ നേതൃത്വത്തിൽ പദ്ധതി എന്നിവയ്ക്ക് തുടക്കം കുറിച്ചു.
ഡോമിസിലറി കോവിഡ് കെയർ സെന്റർ, കുടുബശ്രീ ജനസേവനകേന്ദ്രം, പൊതുശുചിമുറി നിർമാണം എന്നിവയ്ക്ക് നേതൃത്വം നല്കിയതിനോടൊപ്പം, മുന്നണിഭേതമന്യേ വിവിധ വാർഡുകളിൽ വികസനപ്രവർത്തനങ്ങൾ നടത്തുവാനും അദ്ദേഹം മുൻപന്തിയിൽ ഉണ്ടായിരുന്നു.
പാറത്തോട് ഗ്രാമപഞ്ചായത്തിൽ മൊത്തത്തിൽ നടത്തിയ വികസന പ്രവർത്തനങ്ങൾക്കൊപ്പം 18 ആം വാർഡ് മെമ്പർ എന്ന നിലയിൽ ജോണിക്കുട്ടി മഠത്തിനകം സ്വന്തം വാർഡിൽ നടത്തിയ വികസനപ്രവർത്തനങ്ങൾ ഇവയൊക്കെ :
പഞ്ചായത്ത്പടി- പുല്‍ക്കുന്ന് റോഡ് റീടാറിംഗിന് 3 ലക്ഷം രൂപ
പുല്‍ക്കുന്ന് – കരിപ്പാപറമ്പിൽ റോഡ് കോണ്‍ക്രീറ്റിംഗിന് 2 ലക്ഷം രൂപ
CMC കുളമറ്റം റോഡ് കോണ്‍ക്രീറ്റിംഗിന് 4 ലക്ഷം രൂപ
85 അംബേദ്ക്കര്‍ കോളനി റോഡ് റീടാറിംഗിന് 5.5 ലക്ഷം രൂപ
റോഡ് കോണ്‍ക്രീറ്റിംഗിന് 4 ലക്ഷം രൂപ
സംരക്ഷണ ഭിത്തി നിര്‍മ്മിക്കുന്നതിന് 50,000 രൂപയും
അഞ്ചിലവ് റോഡ് റീടാറിംഗിന് 6.90 ലക്ഷം രൂപ
റോഡ് കോണ്‍ക്രീറ്റിംഗിന് 2 ലക്ഷം രൂപ
മയ്യത്താന്‍കര കോളനി റോഡ് കോൺക്രീറ്റിംഗ് 5 ലക്ഷം രൂപ
കോതാമല റോഡ് കോൺക്രീറ്റിംഗ് 4.50 ലക്ഷം രൂപ
പഴുമല കോളനി റോഡ് കോൺക്രീറ്റിംഗ് 1.5 ലക്ഷം രൂപ…
മുന്നണി ധാരണ പ്രകാരം കേരളാകോൺഗ്രസ് എം രണ്ടു വർഷവും, സിപിഎം രണ്ട് വര്‍ഷവും സിപിഐ ഒരു വര്‍ഷവും പ്രസിഡന്റ് സ്ഥാനം പങ്കിടും. കേരള കോണ്‍ഗ്രസ് -എം-അഞ്ച്, സിപിഎം-അഞ്ച്, സിപിഐ-മൂന്ന്, എസ്ഡിപിഐ-രണ്ട്, കേരളാകോൺഗ്രസ്- രണ്ട്, കോണ്‍ഗ്രസ്-ഒന്ന്, സ്വത-ഒന്ന് എന്നിങ്ങനെയാണ് 19 അംഗ പഞ്ചായത്ത് ഭരണസമിതിയിലെ കക്ഷിനില.