മൈസൂരില്‍ വാഹനാപകടം; കാഞ്ഞിരപ്പള്ളി സ്വദേശി ഉൾപ്പെടെ രണ്ട് വിദ്യാർഥികള്‍ക്ക് ദാരുണാന്ത്യം
മൈസൂരില്‍ വെള്ളിയാഴ്ച പുലർച്ചെയുണ്ടായ ബൈക്ക് അപകടത്തിൽ രണ്ട് മലയാളി വിദ്യാർഥികള്‍ക്ക് ദാരുണാന്ത്യം.
കൊല്ലം സ്വദേശി അശ്വിൻ പി.നായർ, മൈസൂരില്‍ സ്ഥിരതാമസമാക്കിയ കാഞ്ഞിരപ്പള്ളി സ്വദേശി കടൂക്കുന്നേൽ ടോം ജോസഫിന്റെയും മിനിയുടെയും പുത്രൻ ജീവൻ ടോം എന്നിവരാണ് മരിച്ചത്. ഇരുവരും മൈസൂരു അമൃത വിദ്യാപീഠത്തിലെ അവസാന വർഷ ബിബിഎ വിദ്യാർഥികളാണ്.
ഇരുവരും സഞ്ചരിച്ചിരുന്ന ബൈക്ക് മൈസൂറിൽ കൂവേമ്പുനഗറിൽ വച്ച് നിയന്ത്രണം വിട്ട് മരത്തില്‍ ഇടിച്ചാണ് അപകടം ഉണ്ടായത്. താമസ സ്ഥലത്ത് നിന്നും കണ്ണൂരിലേക്ക് പോകവെയായിരുന്നു അപകടം.
ഇരുവരും സംഭവ സ്ഥലത്ത് വച്ച് തന്നെ മരിച്ചു. മൃതദേഹം പോസ്റ്റുമോർട്ടത്തിനുശേഷം ബന്ധുക്കള്‍ക്ക് വിട്ടുനല്‍കും. ജീവൻ ടോമിന്റെ സംസ്കാരം, ഞായറാഴ്ച മൂന്നു മണിക്ക് , മൈസൂർ മൗണ്ട് കാർമൽ സിമിത്തേരിയിൽ നടക്കും. അശ്വിന്റെ മൃതദേഹം കൊല്ലത്തേക്ക് കൊണ്ടുപോകും.
ആകാശവാണി മൈസുരു സ്റ്റേഷൻ ഓഫിസർ ആണ് ജീവൻ ടോമിന്റെ പിതാവായ ടോം ജോസഫ് . വിദ്യ, സ്നേഹ എന്നിവർ സഹോദരങ്ങളാണ്