രംഗശ്രീ അവാർഡ് മദ്ദളകലാകാരൻ കലാനിലയം ഓമനക്കുട് പൊൻകുന്നം: രംഗശ്രീ കഥകളി ക്ലബ്ബിന്റെ 2019-20-ലെ രംഗശ്രീ അവാർഡിന് മദ്ദളകലാകാരൻ കലാനിലയം ഓമനക്കുട്ടനെ തിരഞ്ഞെടുത്തു. 30 വർഷമായി കഥകളിരംഗത്ത് നൽകിയ സേവനങ്ങളെ മാനിച്ചാണ് പുരസ്‌കാരം നൽകുന്നതെന്ന് ക്ലബ് പ്രസിഡന്റ് മീനടം ഉണ്ണികൃഷ്ണൻ അറിയിച്ചു. പത്തനംതിട്ട ജില്ലയിലെ മല്ലപ്പള്ളി ആനിക്കാട് വടക്കേമുറിയിൽ ഓമനക്കുട്ടൻ ഇരിങ്ങാലക്കുട ഉണ്ണായിവാര്യർ സ്മാരക കലാനിലയത്തിലാണ് മദ്ദളവാദനം പഠിച്ചത്. കലാമണ്ഡലം ഈശ്വരവാര്യർ, കലാമണ്ഡലം നടരാജൻ എന്നിവരായിരുന്നു ഗുരുക്കൾ. 1990 മുതൽ കഥകളിയിൽ പിന്നണിയിലുണ്ട് ഓമനക്കുട്ടൻ. ശ്രീലേഖയാണ് ഭാര്യ. അശ്വിൻ, അർജുൻ എന്നിവരാണ് മക്കൾ. പുരസ്‌കാരം പിന്നീട് സമ്മാനിക്കും.
