അച്ഛനും മകനും വീടിനുള്ളിൽ തൂങ്ങിമരിച്ച നിലയിൽ

കാഞ്ഞിരപ്പള്ളി : വഞ്ചിമല മാനോലിൽ മാക്കൽ തങ്കച്ചൻ (തങ്കൻ -63), മകൻ അഖിൽ (29) എന്നിവരെ വീടിനുള്ളിൽ തൂങ്ങിമരിച്ച നിലയിൽ കണ്ടെത്തി. ശനിയാഴ്ച പകൽ 11 മണിയോടെയാണ് അയൽവാസികൾ മൃതദേഹങ്ങൾ കണ്ടെത്തിയത്. പരിസരത്ത് ദുർഗന്ധം വമിച്ചപ്പോഴാണ് ഇവർ ശ്രദ്ധിച്ചത്. ഇരുവരും മാത്രമാണ് കഴിഞ്ഞ ദിവസങ്ങളിൽ വീട്ടിലുണ്ടായിരുന്നത്.

പൊൻകുന്നം പോലീസ് സ്ഥലത്തെത്തി പരിശോധന നടത്തി. സംഭവത്തിൽ ദുരൂഹതകളൊന്നുമുള്ളതായി സൂചനയില്ലെന്ന് പോലീസ് പറഞ്ഞു. തങ്കൻ തെങ്ങുകയറ്റ തൊഴിലാളിയും അഖിൽ കൂലിപ്പണിക്കാരനുമായിരുന്നു. മൃതദേഹങ്ങൾ കാഞ്ഞിരപ്പള്ളി ജനറൽ ആശുപത്രി മോർച്ചറിയിലേക്ക് മാറ്റി. തങ്കച്ചന്റെ ഭാര്യ സുജ ഇവരുമായി വേർപിരിഞ്ഞു കഴിയുകയാണ്. മകൾ: അഞ്ജു. മരുമകൻ: മനോജ്.