കുട്ടിക്കാനം മരിയൻ കോളേജിൽ ഏഴാമത് റെയിൻ ഇന്റർനാഷണൽ നേച്ചർ ഫിലിം ഫെസ്റ്റിവൽ ആരംഭിച്ചു

ജയരാജ് ഫൗണ്ടേഷനും ഉന്നത വിദ്യാഭ്യാസ വകുപ്പിനു കീഴിലുള്ള നാഷണൽ സർവീസ് സ്കീമും (എൻ. എസ്. എസ്. ) സംയുക്തമായി മരിയൻ കോളേജ് കമ്യൂണിക്കേഷൻ ആൻഡ് മീഡിയ സ്റ്റഡീസ് വിഭാഗത്തിന്റെയും എൻ എസ് എസ് യൂണിറ്റിന്റെയും നേതൃത്വത്തിൽ കുട്ടിക്കാനം മരിയൻ ഓട്ടോണമസ് കോളേജിൽ വച്ച് നടത്തുന്ന ഏഴാമത് റെയിൻ ഇന്റർനാഷണൽ നേച്ചർ ഫിലിം ഫെസ്റ്റിവൽ എം. ജി. യൂണിവേഴ്സിറ്റി വൈസ് ചാൻസലർ, പ്രഫ. ഡോ. സി. ടി. അരവിന്ദകുമാർ വൃക്ഷത്തൈ നനച്ച് ഉദ്ഘാടനം ചെയ്തു. എൻ. എസ്. എസ്. ഗീതത്തോടുകൂടി ആരംഭിച്ച ഉദ്ഘാടന സമ്മേളനത്തിൽ കോളേജ് പ്രിൻസിപ്പൽ പ്രഫ. ഡോ. അജിമോൻ ജോർജ് ഏവർക്കും സ്വാഗതം ആശംസിച്ചു.

പുതുതലമുറയിൽ നിന്നും അന്യമായിക്കൊണ്ടിരിക്കുന്ന പ്രകൃതി സ്നേഹവും പരിസ്ഥിതി സംരക്ഷണവും തിരികെ കൊണ്ടു വരുവാനുള്ള പരിശ്രമമാണ് ഇത്തരം ഫിലിം ഫെസ്റ്റിവൽ കൊണ്ട് ഉദ്ദേശിക്കുന്നതെന്ന് പ്രമുഖ സിനിമ സംവിധായകൻ ജയരാജ് അധ്യക്ഷ പ്രസംഗത്തിൽ പറഞ്ഞു. ഈ ചലച്ചിത്ര മേള സംഘടിപ്പിക്കാൻ വേദിയൊരുക്കിയ മരിയൻ കോളേജിനെയും മീഡിയ ഡിപ്പാർട്ട്മെന്റിനെയും എൻ. എസ്. എസ്. ടീമിനെയും അദ്ദേഹം അഭിനന്ദിച്ചു. സമ്മേളനത്തിൽ മരിയൻ കോളേജ് മാനേജർ ഫാ. ബോബി അലക്സ് മണ്ണംപ്ലാക്കൽ അനുഗ്രഹ പ്രഭാഷണം നടത്തി. സിനിമാതാരം ജോജി കെ.ജോൺ, ജൂറി ചെയർമാൻ കവിയൂർ ശിവപ്രസാദ്, എൻ. എസ്. എസ്. എംജി യൂണിവേഴ്സിറ്റി പ്രോഗ്രാം കോഡിനേറ്റർ ഇ. എൻ. ശിവദാസൻ, എം.ജി. യൂണിവേഴ്സിറ്റി സിൻഡിക്കേറ്റ് അംഗങ്ങളായ അഡ്വ. റജി സക്കറിയ, പ്രൊഫ. പി. ഹരികൃഷ്ണൻ, മരിയൻ കോളേജ് മീഡിയ വിഭാഗം മേധാവി ഫാ. സോബി തോമസ്, എൻ. എസ്. എസ്. സംസ്ഥാന ഓഫീസർ ഡോ. ദേവപ്രിയ, എൻ. എസ്. എസ്. റീജിയണൽ ഡയറക്ടർ ശ്രീ. വൈ എം ഉപ്പിൻ, ബി സി ഐ നാഷണൽ കോർഡിനേറ്റർ ഡോ. സോമശേഖരൻ, പെരിയാർ ടൈഗർ റിസർവ് അസിസ്റ്റന്റ് ഫീൽഡ് ഡയറക്ടർ ലക്ഷ്മി ആർ., ബി സി ഐ സ്റ്റേറ്റ് കോർഡിനേറ്റർ ഡോ. അഭിലാഷ് ആർ, എൻ. എസ്. എസ്. പ്രോഗ്രാം ഓഫീസർമാരായ ഹരി ആർ എസ്, ഡോ. ഷീല എസ്, മീനു പി തോമസ്, മീഡിയ ഡിപ്പാർട്മെന്റ് ഡയറക്ടർ പ്രഫ. എം വിജയകുമാർ, പ്രോഗ്രാം കോഓർഡിനേറ്റർ ഗിൽബർട്ട് എ ആർ എന്നിവർ പ്രസംഗിച്ചു. സമ്മേളനത്തിൽ പ്രകൃതി പുരസ്കാരത്തിന് അർഹനായ മിസ്റ്റർ അബ്ദുൾ കരീമിനെ ആദരിക്കുകയും ഫെസ്റ്റിവൽ ബുക്ക് പ്രകാശനം നടത്തുകയും ചെയ്തു.

പ്രകൃതി, പരിസ്ഥിതി സംരക്ഷണം എന്നിവ മുഖ്യവിഷയമാക്കിയുള്ള സിനിമകളാണ് മേളയിൽ പ്രദർശിപ്പിക്കുന്നത്. ചലച്ചിത്ര മേളയോടനുന്ധിച്ച് വിവിധ തരത്തിലുള്ള ക്യാമറകളുടെയും പ്രകൃതി ചിത്രങ്ങളുടെയും പ്രദർശനവും ഒരുക്കിയിട്ടുണ്ട്. പ്രകൃതിയുമായി ഇഴചേർന്നുനിൽക്കുന്ന സൈലന്റ് വാലി, ബൈസൻ വാലി, കുറിഞ്ഞിമല, ചോലമല, നിള, പെരിയാർ എന്നീ പേരുകൾ നല്കിയ വേദികളിലായാണ് സിനിമ പ്രദർശനവും എക്സിബിഷനും നടക്കുക. വിവിധ സ്ഥലങ്ങളിൽ നിന്നായി അഞ്ഞൂറിലധികം വിദ്യാർഥികൾ മേളയിൽ പങ്കെടുക്കുന്നു. രാജ്യാന്തര ചലച്ചിത്രങ്ങൾക്കൊപ്പം വിദ്യാർത്ഥികൾ നിർമിച്ച നൂറ്റി മുപ്പതിലധികം ഹ്രസ്വചിത്രങ്ങളുടെയും പ്രദർശനത്തിനു ശേഷം ഇന്ന് മേള സമാപിക്കും.