നെൻമേനി പാലം നവംബർ 15-ന് നാടിന് സമർപ്പിക്കും. ആഘോഷത്തിമിർപ്പിൽ പ്രദേശവാസികൾ.

മുണ്ടക്കയം : കാലവർഷത്തിൽ തോട് കരകവിഞ്ഞ് ഒഴുകുന്നതോടെ യാത്രാദുരിതത്തിലായിരുന്ന നെൻമേനി നിവാസികളുടെ പതിറ്റാണ്ടുകളായുള്ള കാത്തിരിപ്പിന് വിരാമമാകുകയാണ്. മുണ്ടക്കയം നെൻമേനിയിൽ തോടിന് കുറുകെ നിർമ്മിച്ച പുതിയ പാലം നവംബർ 15-ന് നാടിന് സമർപ്പിക്കും.

​മഴക്കാലത്ത് തോട് കരകവിഞ്ഞൊഴുകുന്നതോടെ നെൻമേനി അമ്പലം ഭാഗത്തെ ജനങ്ങളുടെ സഞ്ചാരം പൂർണ്ണമായും തടസ്സപ്പെടുന്ന അവസ്ഥയായിരുന്നു. സ്കൂൾ വിദ്യാർത്ഥികളും, രോഗികളും, ക്ഷേത്ര ആരാധനയ്ക്ക് എത്തുന്നവരും ഉൾപ്പെടെയുള്ളവർ, മറുകരയെത്താൻ കിലോമീറ്ററുകളോളം ചുറ്റിസഞ്ചരിക്കേണ്ടി വന്നിരുന്ന പ്രതിസന്ധിക്കാണ് പാലം യാഥാർത്ഥ്യമായതോടെ ശാശ്വത പരിഹാരമായിരിക്കുന്നത്.
​
കഴിഞ്ഞ എൽ.ഡി.എഫ്. ഭരണസമിതിയുടെ അവസാന വർഷത്തിൽ ആരംഭിച്ച പദ്ധതി, ജില്ലാ-ഗ്രാമ പഞ്ചായത്തുകളുടെ ഫണ്ട് ഉപയോഗിച്ചാണ് പൂർത്തിയാക്കിയത്. അത്യാധുനിക രീതിയിൽ നിർമ്മിച്ച പാലം പ്രദേശത്തിന്റെ സാമൂഹിക-സാമ്പത്തിക വികസനത്തിന് പുതിയ കുതിപ്പേകുമെന്ന പ്രതീക്ഷയിലാണ് നാട്ടുകാർ.

​നവംബർ 15-ന് വൈകുന്നേരം നാലിൻ നടക്കുന്ന ചടങ്ങിൽ വാർഡ് മെമ്പർ സി.വി. അനിൽകുമാർ അധ്യക്ഷനാകും. ജില്ലാ പഞ്ചായത്ത് മെമ്പർ അഡ്വ. പി. ജീരാജ് പാലം ജനങ്ങൾക്കായി തുറന്നുകൊടുക്കും. പഞ്ചായത്ത് പ്രസിഡന്റ് സൂസമ്മ മാത്യു മുഖ്യപ്രഭാഷണം നടത്തും.
​ചടങ്ങിൽ ബ്ലോക്ക് മെമ്പർ റോസമ്മ ജോൺ പഞ്ചായത്ത് സെക്രട്ടറി ഷാഹുൽ അഹമ്മദ്, മുൻ ജില്ലാ പഞ്ചായത്ത് മെമ്പർ പി.ആർ. അനുപമ, സി.ഡി.എസ്. ചെയർപേഴ്സൺ ഷിജി ഷാജി എന്നിവരും വിവിധ രാഷ്ട്രീയ-സാമൂഹിക നേതാക്കളും പങ്കെടുക്കും. പാലത്തിന്റെ ഉദ്ഘാടനം ഒരു നാടിന്റെ ഉത്സവമാക്കി മാറ്റാനുള്ള തയ്യാറെടുപ്പിലാണ് ഗ്രാമവാസികൾ.