ഇളങ്ങുളത്ത് കാട്ടുപന്നികൾ കൃഷി നശിപ്പിക്കുന്നു
ഇളങ്ങുളം: ഇളങ്ങുളം മേഖലയിൽ കാട്ടുപന്നികൾ വ്യാപകമായി കൃഷി നശിപ്പിക്കുന്നതായി കർഷകരുടെ പരാതി. ചന്തക്കവല ഭാഗത്ത് കൃഷിയിടങ്ങളിൽ വിവിധയിനം വിളകൾ പന്നികൾ നശിപ്പിച്ചിട്ടുണ്ട്. കൂടുതൽ നാശനഷ്ടം കപ്പത്തോട്ടങ്ങളിലാണ്.
പറമ്പുകളിലെ പൊന്തക്കാടുകളിൽ കാട്ടുപന്നികളുണ്ടെന്നാണ് കർഷകർ പറയുന്നത്. വിളവെടുപ്പിന് പാകമായ വിളകളെല്ലാം മണ്ണിളക്കി കുത്തിമറിച്ചിട്ട നിലയിലാണ്. മണലുങ്കൽ എം.ജി.സുനിലിന്റെയും കാളകെട്ടി അപ്പച്ചന്റെയും കപ്പത്തോട്ടത്തിൽ വ്യാപകനാശമുണ്ട്. മുന്നൂറിലേറെ മൂട് കപ്പയാണ് ഇവിടെ നശിപ്പിച്ചത്.