പ്രാദേശിക കാർഷിക-ഭക്ഷ്യ ഉൽപ്പന്നങ്ങൾക്ക് വിദേശവിപണിയൊരുക്കുവാൻ എക്സ്പോർട്ട് വർക്ക് ഷോപ്പ് സംഘടിപ്പിച്ച് കാഞ്ഞിരപ്പള്ളി ബ്ലോക്ക് പഞ്ചായത്ത്.
കാഞ്ഞിരപ്പളളി: കാർഷിക ഭക്ഷ്യമേഖലയിലെ മൂല്യവർദ്ധിത ഉൽപ്പന്നങ്ങൾക്ക് ന്യായവില ലഭ്യമാക്കി വിദേശ മാർക്കറ്റുകളിൽ എത്തിക്കാൻ കാഞ്ഞിരപ്പള്ളി ബ്ലോക്ക് പഞ്ചായത്തും, താലൂക്ക് വ്യവസായ വകുപ്പും സംയുക്തമായി പദ്ധതികൾ തയ്യാറാക്കുമെന്ന് ബ്ലോക്ക് പഞ്ചായത്ത് പ്രസിഡൻറ് അജിത രതീഷ് അഭിപ്രായപ്പെട്ടു. കാഞ്ഞിരപ്പളളി സെന്റ് ഡൊമിനിക്സ് കോളേജിൽ നടന്ന എക്സ്പോർട്ട് വർക്ക് ഷോപ്പ് ഉദ്ഘാടനം ചെയ്ത് സംസാരിക്കുന്നയായിരുന്നു അജിത രതീഷ്.
ബ്ലോക്ക് പഞ്ചായത്ത് വൈസ് പ്രസിഡൻറ് ജോളി മടുക്കകുഴി അദ്ധ്യക്ഷത വഹിച്ച യോഗത്തിൽ ജില്ലാ പഞ്ചായത്ത് അംഗം ജെസ്സി ഷാജൻ, ജില്ലാ വ്യവസായ ഓഫീസർ രാകേഷ് വി.ആർ., കോളേജ് പ്രിൻസിപ്പല് ഡോ. സീമോൻ തോമസ്, താലൂക്ക് വ്യവസായ മേധാവി ഫൈസൽ കെ.കെ., ലോറൻസ് മാത്യൂ തുടങ്ങിയവർ സംസാരിച്ചു.
ചെറുകിട, ഇടത്തരം സംരംഭകർ ഉൽപ്പാദിപ്പിക്കുന്ന ഉൽപ്പന്നങ്ങൾ കയറ്റുമതി ചെയ്യുന്നതിനാവശ്യമായ തുടർനടപടികൾ വ്യവസായ വകുപ്പ് ഏറ്റെടുക്കുമെന്നും അറിയിച്ചു. മികച്ച സംരംഭകരായ കല്ലൂർ ഇലക്ട്രോണിക്സ് എം.ഡി. ജേക്കബ് കെ ജേക്കബ്, ലോജിസ്റ്റിക്ക് കണ്സൾട്ടൻറ് ശങ്കർ ചന്ദ്രശേഖർ എന്നിവർ വിവിധ വിഷയങ്ങളിൽ ക്ലാസ്സെടുത്തു. ഉൽപ്പന്നങ്ങൾ കയറ്റുമതി ചെയ്യുന്നതുമായി ബന്ധപ്പെട്ട കാര്യങ്ങൾ മനസ്സിലാക്കുവാൻ സംരംഭകർക്ക് അവസരം ലഭിച്ചു. കാഞ്ഞിരപ്പള്ളി താലൂക്കിലെ നവസംരഭകർ ഉൾപ്പെടെ നിരവധി സംരംഭകർ ശിൽപ്പശാലയിൽ പങ്കെടുത്തു.