ചെറുവള്ളിയിൽ ദളിത് വയോധികന് നേരെ നടന്ന ആക്രമണം: 6 ദിവസത്തെ ആശുപത്രി വാസത്തിന് ശേഷം ഡിസ്ചാർജ് ആയി; കേൾവിക്കും ഗുരുതര തകരാർ; SC/ST Act പ്രകാരം നടപടിക്ക് ITD-യുടെ ഇടപെടൽ

ചെറുവള്ളി: വഴിതടഞ്ഞുനിർത്തി കമ്പിവടി കൊണ്ട് ക്രൂരമായി മർദ്ദിക്കുകയും, ചെവിയുടെ പിന്നിൽ അടിയേറ്റ് കേൾവിക്കുറവ് സംഭവിക്കുകയും ചെയ്ത ദളിത് വയോധികൻ 6 ദിവസത്തെ ആശുപത്രി വാസത്തിന് ശേഷം കാഞ്ഞിരപ്പള്ളി ഗവ. താലൂക്ക് ആശുപത്രിയിൽ നിന്നും ഡിസ്ചാർജ് ആയി. ചെറുവള്ളി പടിഞ്ഞാറെടത്ത് വീട്ടിൽ ബാബു P.R (55)-യ്ക്കാണ് (തെക്കേത്തുകവല P.O, ചെറുവള്ളി) അക്രമത്തിൽ ഗുരുതരമായി പരിക്കേറ്റത്.
​കഴിഞ്ഞ 02/08/2026-ന് രാത്രി 09:30-ഓടെ ചെറുവള്ളിയിലെ സ്വന്തം വീടിന് സമീപമുള്ള റോഡിൽ വെച്ചാണ് അയൽവാസികളായ പ്രവീൺ കുമാർ (കയംപ്ലാക്കൽ വീട്, ചെറുവള്ളി), ഇയാളുടെ പിതാവ് എന്നിവർ ചേർന്ന് ബാബുവിനെ അക്രമിച്ചത്. പ്രതികളുടെ പുരയിടത്തിലെ കയ്യാലയിലെ കല്ലുകൾ ഇളക്കി മാറ്റി എന്ന് ആരോപിച്ച് പൂർവ്വവൈരാഗ്യത്തോടെയായിരുന്നു അക്രമം. 1-ാം പ്രതി പ്രവീൺ കുമാർ കമ്പിവടി കൊണ്ട് കാൽ തുടകളിലും തോളുകളിലും അടിച്ച് പരിക്കേൽപ്പിക്കുകയും, 2-ാം പ്രതി ചെവിയുടെ പിന്നിൽ ശക്തിയായി മർദ്ദിക്കുകയുമായിരുന്നു. മർദ്ദനത്തിൽ ചെവിക്ക് ഗുരുതരമായി പരിക്കേറ്റ ബാബുവിന് കേൾവിക്കുറവ് അനുഭവപ്പെടുന്നുണ്ട്.
​സംഭവത്തിൽ മണിമല പോലീസ് എഫ്.ഐ.ആർ (Crime No. 0788/2026) രജിസ്റ്റർ ചെയ്തെങ്കിലും, ബാബു നൽകിയ മൊഴിയിലുള്ള ജാതി അധിക്ഷേപവും ചെവിക്കേറ്റ ഗുരുതര പരിക്കും ഒഴിവാക്കി സാധാരണ ബി.എൻ.എസ് (BNS) വകുപ്പുകൾ മാത്രമാണ് ചുമത്തിയിരുന്നത്. പട്ടികജാതി/പട്ടികവർഗ്ഗ അതിക്രമ നിരോധന നിയമ പ്രകാരമുള്ള (SC/ST Act) ജാമ്യമില്ലാ വകുപ്പുകൾ ഉൾപ്പെടുത്താതെ മണിമല എസ്.ഐ (SI) കേസ് ഒതുക്കി തീർക്കാൻ ശ്രമിക്കുന്നു എന്ന ആരോപണം ഉയർന്നതോടെയാണ് കുടുംബം കാഞ്ഞിരപ്പള്ളി ഐ.ടി.ഡി (ITD) ഓഫീസിൽ പരാതി നൽകിയത്.
​തുടർന്ന് കാഞ്ഞിരപ്പള്ളി ITD ഓഫീസ് വിഷയം ഏറ്റെടുക്കുകയും, കേസിൽ പട്ടികജാതി അതിക്രമ നിരോധന നിയമ പ്രകാരമുള്ള (SC/ST Act) വകുപ്പുകൾ ചുമത്തി അന്വേഷണം നടത്താൻ കോട്ടയം ജില്ലാ പ്രോജക്ട് ഓഫീസർക്കും (വൈക്കം ITDP ഓഫീസ്) ഡെപ്യൂട്ടി സൂപ്രണ്ട് ഓഫ് പോലീസിനും (DySP, Kanjirappally) ഔദ്യോഗികമായി പരാതി അയക്കുകയും ചെയ്തു.
​ITD ഉദ്യോഗസ്ഥരുടെയും ജനപ്രതിനിധികളുടെയും ഇടപെടലിനെ തുടർന്ന് കേസിന്റെ അന്വേഷണം കാഞ്ഞിരപ്പള്ളി DySP ഏറ്റെടുക്കുമെന്നും, എഫ്.ഐ.ആറിൽ SC/ST (POA) Act പ്രകാരമുള്ള വകുപ്പുകൾ കൂട്ടിച്ചേർക്കുമെന്നും അധികാരികൾ ഉറപ്പുനൽകിയിട്ടുണ്ട്. ആറ് ദിവസത്തെ ചികിത്സയ്ക്ക് ശേഷം വീട്ടിലേക്ക് മടങ്ങുന്ന ബാബുവിന് നടക്കാനോ സ്വാഭാവിക ജോലി ചെയ്യാനോ ഇനിയും സാധ്യമല്ല. കുറ്റക്കാർക്കെതിരെ ശക്തമായ നിയമനടപടി സ്വീകരിക്കണമെന്നാണ് കുടുംബത്തിന്റെ ആവശ്യം.