മുക്കൂട്ടുതറ∙ കൈകാലുകളിൽ 24 വിരലുകളുള്ള വിനേഷിന് ഇന്ത്യൻ ബുക്ക് ഓഫ് റെക്കോഡിന്റെ അംഗീകാരം. അധികമായി വരുന്ന വിരലുകളിലൽ അസ്ഥികൾ പലർക്കും ഇല്ലാതിരിക്കെ, ആരോഗ്യമുള്ള വിരൽ തന്നെയെന്നു സാക്ഷ്യപ്പെടുത്തിയതോടെയാണ് അപൂർവ ബഹുമതി. മുട്ടപ്പള്ളി പാറക്കുഴിയിൽ‍ വിജയൻ–രത്നമ്മ ദമ്പതികളുടെ മകൻ വിനേഷിന് ജന്മനാ ലഭിച്ചതാണ് 12 വീതം കൈകാൽ വിരലുകൾ. നിർമാണ മേഖലയിൽ പ്രവർത്തിക്കുന്ന വിനീഷിന് അധികമായുള്ള വിരലുകൾ ഒരു തരത്തിലും ബുദ്ധിമുട്ട് സൃഷ്ടിക്കുന്നില്ല. മാത്രമല്ല, പലപ്പോഴും ഉപകാരപ്പെടുകയും ചെയ്യുന്നതായി വിനീഷ് പറയുന്നു.

ആരോഗ്യമുള്ള 24 വിരലുകളെക്കുറിച്ച് വിനീഷ് അടുത്തയിടെ ഇന്ത്യൻ ബുക്ക് ഓഫ് റെക്കോർഡ്സിൽ അറിയിക്കുകയായിരുന്നു. ഇന്ത്യയിൽ പൂർണ ആരോഗ്യമുള്ള 24 വിരലുകളുള്ള ആരും ജീവിച്ചിരിപ്പില്ലെന്ന് ബുക്ക് ഓഫ് റെക്കോർഡ്സ് അധികൃതർ പറയുന്നു. വൈദ്യശാസ്ത്ര പരിശോധനകൾ പൂർത്തിയാക്കിയ ശേഷമാണു ബുക്ക് ഓഫ് റെക്കോർഡ്സ് ബഹുമതി നൽകിയത്. ഇന്നലെ മുക്കൂട്ടുതറയിൽ നടന്ന ചടങ്ങിൽ ഡോ.ഗിന്നസ് മാടസ്വാമി ബഹുമതി നൽകി. പഞ്ചായത്ത്  പ്രസിഡന്റ് തങ്കമ്മ ജോർജ്കുട്ടി യോഗം ഉദ്ഘാടനം ചെയ്തു. വെച്ചൂച്ചിറ എസ്എച്ച്ഒ ജെർലിൻ സ്കറിയ സർട്ടിഫിക്കറ്റ് നൽകി.