March 25, 2017 

കാഞ്ഞിരപ്പള്ളി : കാഞ്ഞിരപ്പള്ളിയിലെ ഈ സമയത്തെ ഹീറോ കാഞ്ഞിരപ്പള്ളി എസ് ഐ എ.എസ് അന്‍സില്‍ തന്നെയെന്ന കാര്യത്തിൽ ആർക്കും സംശയമില്ല. കഴിഞ്ഞ ഏതാനും ദിവസങ്ങളായി നായകനായും, കുറെ സമയം വില്ലനായും, വീണ്ടും നായകനായും പൊതുരംഗത്തു നിറഞ്ഞു നിൽക്കുകയാണ് കാഞ്ഞിരപ്പള്ളിയിലെ ചുറുചുറുക്കുള്ള യുവാവായ എസ് ഐ. അന്‍സില്‍. 

വിധവയായ ബബിതയെയും മകളെയും ഒഴിപ്പിക്കണം എന്ന ഉത്തരവുണ്ടായിട്ടും, അതിൽ നിന്നും അവരെ ഒഴിവാക്കുവാൻ വളരെയധികം പരിശ്രമിച്ചപ്പോൾ എസ് ഐ എ.എസ് അൻസിലിനു നായകന്റെ പരിവേഷമായിരുന്നു. ഒടുവിൽ ശനിയാഴ്ച ഒരു  മണിക്കുള്ളിൽ അവരെ ഒഴിപ്പിക്കണം എന്ന മുൻസിഫ് കോടതിയുടെ കർശന ഉത്തരവ് വന്നതോടെ അൻസിലിനു മറ്റു മാര്ഗങ്ങൾ ഇല്ലന്നായി. മനസ്സ് കല്ലാക്കി കൊണ്ട് ഒഴിപ്പിക്കുവാൻ എത്തിയ എസ് ഐയോട് തനിക്കു ഹൈക്കോടതിയിൽ നിന്നും സ്റ്റേ ഉത്തരവ് കിട്ടി എന്നും, ഉത്തരവ് ഉടൻ എത്തിക്കാം എന്നും വിധവയായ ബബിത കരഞ്ഞുകൊണ്ട് അപേക്ഷിച്ചെങ്കിലും, ഉത്തരവിന്റെ പകർപ്പ് കൈയിൽ കിട്ടാത്തതിനാൽ, കിടക്കയിൽ നിന്നും എണീക്കുവാൻ പോലും സാധിക്കാതെ രോഗിയായ വിധവയെ കിടക്കയോടെ പൊക്കിയെടുത്തു വീടിനു പുറത്താക്കി കർശനമായി കോടതിയുടെ ഉത്തരവ് നടപ്പാക്കിയപ്പോൾ എസ് ഐ അന്‍സിലിന് കുറെ സമയത്തേക്ക് ഒരു വില്ലൻ പരിവേഷമായിരുന്നു. 

എന്നാൽ തന്റെ ഔദ്യോഗിക കടമ പൂർത്തീകരിച്ച ശേഷം, ബബിതക്കും മകൾക്കും ആവശ്യമുള്ള സഹായങ്ങൾ ചെയ്തുകൊടുക്കുവാൻ മുന്നിട്ടിറങ്ങിയതോടെ എസ് ഐ അന്‍സില്‍ വീണ്ടും നായക വേഷത്തിലെത്തി. 

കാഞ്ഞിരപ്പള്ളിയിൽ വച്ച് ടേക്ക് ഓഫ് സിനിമയുടെ പ്രവർത്തകർ ബബിതക്ക് അഞ്ചു ലക്ഷം രൂപ നൽകുന്ന ചടങ്ങിനെത്തിയ സിനിമ താരം കുഞ്ചാക്കോ ബോബൻ എസ് ഐ അൻസലിനെ പ്രതേകം തോളിൽ തട്ടി അഭിനന്ദിച്ചപ്പോൾ കാണികൾ കരഘോഷത്തോടെ സ്വീകരിച്ചത് എസ് ഐ അൻസലിന്റെ ജനപ്രീതിയുടെ തെളിവാണ് . 

കാക്കിക്കുള്ളിലെ ആ നന്മ നിറഞ്ഞ ഹൃദയത്തിനു ഞങ്ങളുടെ ഹൃദയം നിറഞ്ഞ അഭിനന്ദനങ്ങൾ … 

വീഡിയോ കാണുക