ഇന്നു ചൂട് കൂടും; കോട്ടയം ഉൾപ്പെടെ 6 ജില്ലകളിൽ യെലോ അലർട്ട്

ഇന്നും നാളെയും സംസ്ഥാനത്ത് ചൂട് കൂടുമെന്ന് കാലാവസ്ഥാ വകുപ്പ്. 6 ജില്ലകളിൽ ഈ ദിവസങ്ങളിൽ യെലോ അലർട്ട് പ്രഖ്യാപിച്ചു. കോട്ടയം, കൊല്ലം, ആലപ്പുഴ, പാലക്കാട്, കോഴിക്കോട്, കണ്ണൂർ ജില്ലകളിലാണ് ഇന്നും നാളെയും യെലോ അലർട്ട് പ്രഖ്യാപിച്ചത്.

പകൽ 11 മുതൽ 3 വരെ സൂര്യപ്രകാശം നേരിട്ട് ഏൽക്കാതിരിക്കാൻ ശ്രദ്ധിക്കണമെന്നും ഈ സമയത്ത് പശുക്കളെ തുറന്ന സ്ഥലങ്ങളിൽ കെട്ടരുതെന്നും ഐഎംഡി അറിയിച്ചു. തുണി, തൊപ്പി, കുട തുടങ്ങിയവ ഉപയോഗിച്ച് തല മറയ്ക്കണമെന്നും ദാഹമില്ലെങ്കിലും കൂടുതൽ‍ വെള്ളം കുടിക്കണമെന്നും നിർദേശങ്ങളിൽ പറയുന്നു. ഇന്നലെ പുനലൂരിലാണ് ഏറ്റവും കൂടുതൽ താപനില രേഖപ്പെടുത്തിയത് (38.8 ഡിഗ്രി സെൽഷ്യസ്).