ഫ്യൂച്ചർ സ്റ്റാർസ് എഡ്യൂക്കേഷൻ പ്രോജക്റ്റിന്റെ ആഭിമുഖ്യത്തിൽ വിദ്യാർത്ഥികളുടെ ദന്തപരിശോധന നടത്തി .

കണമല : അഡ്വ.സെബാസ്റ്റ്യൻ കുളത്തുങ്കൽ എംഎൽഎ നേതൃത്വം നൽകുന്ന വിദ്യാഭ്യാസ ഗുണമേന്മ പദ്ധതിയായ ഫ്യൂച്ചർ സ്റ്റാർസ് എഡ്യൂക്കേഷൻ പ്രോജക്റ്റിന്റെ ആഭിമുഖ്യത്തിൽ കോട്ടയം ഗവൺമെന്റ് ദന്തൽ കോളേജിന്റെ സഹകരണത്തോടെ സ്കൂൾ വിദ്യാർത്ഥികൾക്ക് ദന്ത പരിശോധന ക്യാമ്പ് കണമല സന്തോം ഹൈസ്കൂളിൽ നടത്തി. പദ്ധതിയുടെ ഉദ്ഘാടനം അഡ്വ. സെബാസ്റ്റ്യൻ കുളത്തുങ്കൽ എംഎൽഎ നിർവഹിച്ചു. ഗ്രാമപഞ്ചായത്ത് പ്രസിഡന്റ് മറിയാമ്മ സണ്ണിയുടെ അധ്യക്ഷയായി.

വാർഡ് മെമ്പർ മറിയാമ്മ ജോസഫ്, പ്രോജക്ട് കോർഡിനേറ്റർ ഡോ. മാത്യു കണമല, സ്കൂൾ ഹെഡ്മാസ്റ്റർ ലിജോ ജോൺ,ഡോ. ഇവാൻ ക്ലിഫ് റിബെല്ലോ, ഡോ.രാഹുൽ രാജ്, ഡോ.വൃന്ദ ടി.വി, ഡോ.കീർത്തന എൻ.എ തുടങ്ങിയവർ പ്രസംഗിച്ചു.

കുട്ടികളുടെ ദന്താരോഗ്യം സംരക്ഷിക്കുന്നതിനും, അവ സംബന്ധിച്ച് ശരിയായ അവബോധം നൽകുന്നതിനും , ദന്തരോഗ നിർണ്ണയം നടത്തി തുടർന്ന് ആവശ്യമുള്ളവർക്ക് കോട്ടയം ദന്തൽ കോളേജിൽ സൗജന്യമായി തുടർചികിത്സ നൽകുന്നതിനുമായി നടത്തിയ ഈ പദ്ധതിയുടെ ഭാഗമായി ഡോ. ഇവാൻ ക്ലിഫ് റെബല്ലോ കുട്ടികൾക്ക് ബോധവൽക്കരണ ക്ലാസ് നയിച്ചു.

കഴിഞ്ഞ മൂന്നു വർഷക്കാലമായി ഫ്യൂച്ചർ സ്റ്റാർ എഡ്യൂക്കേഷൻ പ്രോജക്റ്റിന്റെ നേതൃത്വത്തിൽ വിവിധ പാഠ്യ-പാഠ്യേതര പ്രവർത്തനങ്ങൾ പൂഞ്ഞാർ നിയോജക മണ്ഡലത്തിലെ ഹൈസ്കൂൾ, ഹയർസെക്കൻഡറി, കോളേജ് തലങ്ങളിലെ വിദ്യാർത്ഥികൾക്കായി നടത്തിവരുന്നുണ്ട്.