കാഞ്ഞിരപ്പള്ളി ∙ കാറിടിച്ച് ബൈക്ക് യാത്രികനു പരുക്കേറ്റു. തലയ്ക്കു പരുക്കേറ്റ തമ്പലക്കാട് മുല്ലശേരിയിൽ ആസിഫ് മുഹമ്മദിനെ സ്വകാര്യ ആശുപത്രിയിൽ പ്രവേശിപ്പിച്ചു. ഇന്നലെ രാവിലെ പത്തരയോടെ കാഞ്ഞിരപ്പള്ളി – ഈരാറ്റുപേട്ട റോഡിൽ കപ്പാട്ടാണ് അപകടമുണ്ടായത്. കാളകെട്ടി പ്രാഥമികാരോഗ്യ കേന്ദ്രത്തിൽ നിന്നു വാക്സീൻ എടുത്ത ശേഷം വീട്ടിലേക്കു മടങ്ങുകയായിരുന്ന ആസിഫും സഹോദരനും സഞ്ചരിച്ച ബൈക്ക് കപ്പാട് – തമ്പലക്കാട് റോഡിലേക്കു തിരിയുമ്പോൾ പിന്നാലെ എത്തിയ കാർ ഇടിക്കുകയായിരുന്നു.

ബൈക്കിന്റെ പിന്നിലിരുന്ന ആസിഫ് റോഡിൽ വീണാണു പരുക്കേറ്റത്. ഒരാഴ്ചയ്ക്കിടെ കാഞ്ഞിരപ്പള്ളി – ഈരാറ്റുപേട്ട റോഡിലുണ്ടാകുന്ന മൂന്നാമത്തെ അപകടമാണിത്. കഴിഞ്ഞ ദിവസം മഞ്ഞപ്പള്ളിക്കു സമീപം ബൈക്കും സ്കൂട്ടറും കൂട്ടിയിടിച്ചുണ്ടായ അപകടത്തിൽ യുവാവ് മരിച്ചു. പിറ്റേന്ന് ഇതിനു സമീപം കാർ നിയന്ത്രണം വിട്ടു വൈദ്യുത പോസ്റ്റിലിടിച്ച് ഒരാൾക്കു പരുക്കേറ്റിരുന്നു.