പ്രളയത്തിൽ പൂഞ്ഞാർ, കാഞ്ഞിരപ്പള്ളി നിയോജക മണ്ഡലങ്ങളിൽ പൂർണമായും വീടു നഷ്ടപ്പെട്ടവർക്കുള്ള ധനസഹായം മന്ത്രി അഡ്വ. കെ. രാജൻ വിതരണം ചെയ്തു.

മുണ്ടക്കയം : കൂട്ടിക്കൽ പ്രളയദുരന്ത ബാധിതർക്ക് വീടു നിർമ്മിക്കുവാൻ ഭവനനിർമ്മാണ സാമഗ്രികൾ 15 ശതമാനം വിലക്കിഴിവിൽ ലഭ്യമാക്കുമെന്ന് റവന്യൂ മന്ത്രി അഡ്വ. കെ. രാജൻ പറഞ്ഞു. കഴിഞ്ഞ ഒക്ടോബർ 16നുണ്ടായ പ്രളയത്തിൽ പൂഞ്ഞാർ, കാഞ്ഞിരപ്പള്ളി നിയോജക മണ്ഡലങ്ങളിൽ പൂർണമായി വീടു നഷ്ടപ്പെട്ടവർക്കുള്ള ധനസഹായ വിതരണോദ്ഘാടനം കൂട്ടിക്കലിൽ നിർവഹിച്ചു പ്രസംഗിക്കുകയായിരുന്നു മന്ത്രി. കേരള സംസ്ഥാന നിർമ്മിതി കേന്ദ്രത്തിന്റെ കലവറ പദ്ധതിയിൽ ഉൾപ്പെടുത്തിയാണ് വീടുനഷ്ടപ്പെട്ടവർക്ക് ഭവനനിർമാണ സാമഗ്രികൾ ലഭ്യമാക്കുക.

കേരളത്തിൽ ആദ്യമായി ദുരിതാശ്വാസധന സഹായം ആശ്രിതരുടെ ബാങ്ക് അക്കൗണ്ടുകളിലേക്ക് നേരിട്ട് എത്തിക്കാൻ സാധിച്ചത് കൂട്ടിക്കലിലാണ്. ദുരന്തം സംഭവിച്ചു മൂന്നു മാസത്തിനുള്ളിൽ തന്നെ ദുരിതാശ്വാസ ധനസഹായം വിതരണം ആരംഭിച്ചിരുന്നു.

അടിക്കടിയുണ്ടാകുന്ന പ്രകൃതി ദുരന്തങ്ങളുടെ പശ്ചാത്തലത്തിൽ സംസ്ഥാനത്തു ദുരന്ത നിവാരണ സാക്ഷരതാ യജ്ഞത്തിനു സർക്കാർ തുടക്കം കുറിക്കും. സാക്ഷരത യജ്ഞം പോലെ ദുരന്തനിവാരണ സാക്ഷരത യജ്ഞം നടത്താനാണ് ഉദ്ദേശിക്കുന്നത്. വിവിധ സർക്കാർ വകുപ്പുകളെയും സംഘടനകളെയും പൊതുജനങ്ങളെയും യജ്ഞത്തിൽ ഉൾപ്പെടുത്തുമെന്നും റവന്യൂ മന്ത്രി പറഞ്ഞു.

ദുരിതബാധിതർക്ക് ഓഫീസുകൾ കയറിയിറങ്ങാതെ തന്നെ ബാങ്കിലേക്ക് ദുരിതാശ്വാസധനസഹായം എത്തിക്കാൻ സർക്കാരിനായതായി യോഗത്തിൽ അധ്യക്ഷത വഹിച്ച സഹകരണ-രജിസ്ട്രേഷൻ വകുപ്പ് മന്ത്രി വി.എൻ. വാസവൻ പറഞ്ഞു. സംസ്ഥാനത്തെ ഏറ്റവും ശ്രദ്ധേയമായ രക്ഷാപ്രവർത്തനമാണ് കൂട്ടിക്കലിൽ നടന്നത്. രക്ഷാ-ദുരിതാശ്വാസ പ്രവർത്തനങ്ങളിൽ പങ്കാളികളായ വിവിധ വകുപ്പുകളെയും സംഘടനകളെയും ജനങ്ങളെയും മന്ത്രി അഭിനന്ദിച്ചു.

എല്ലാ ദുരന്ത ബാധിതർക്കും കാലതാമസമില്ലാതെ ധനസഹായം വിതരണം ചെയ്യാൻ സാധിച്ചത് സർക്കാരിന്റെ ആധുനിക സംവിധാനങ്ങളുടെ മികവാണെന്നും സർക്കാർ മികച്ചനിലയിൽ ഇടപെട്ടതായും മുഖ്യപ്രഭാഷണം നടത്തിയ സർക്കാർ ചീഫ് വിപ്പ് ഡോ. എൻ. ജയരാജ് പറഞ്ഞു.
ആന്റോ ആന്റണി എം.പി, അഡ്വ. സെബാസ്റ്റ്യൻ കുളത്തുങ്കൽ എം.എൽ.എ, ജില്ലാ കളക്ടർ ഡോ.പി.കെ. ജയശ്രീ, ഈരാറ്റുപേട്ട നഗരസഭാധ്യക്ഷ സുഹറ അബ്ദുൾ ഖാദർ, ജില്ലാ പഞ്ചായത്ത് അംഗങ്ങളായ പി.ആർ. അനുപമ, ശുഭേഷ് സുധാകരൻ, കാഞ്ഞിരപ്പള്ളി ബ്ലോക്ക് പഞ്ചായത്ത് പ്രസിഡന്റ് അജിത രതീഷ്, ഗ്രാമപഞ്ചായത്ത് പ്രസിഡന്റുമാരായ പി.എസ് സജിമോൻ(കൂട്ടിക്കൽ), രേഖാ ദാസ് (മുണ്ടക്കയം),തങ്കമ്മ ജോർജ്ജുകുട്ടി (എരുമേലി), ജോണിക്കുട്ടി മഠത്തിനകം
(പാറത്തോട്),സന്ധ്യ വിനോദ് (കോരുത്തോട് ), കെ.ആർ തങ്കപ്പൻ ( കാഞ്ഞിരപ്പള്ളി), വിജി ജോർജ്ജ് ( തിടനാട് ), ഗീതാ നോബിൾ (പൂഞ്ഞാർ), ജോർജ്ജ് മാത്യു ( പൂഞ്ഞാർ തെക്കേക്കര), കെ.സി ജെയിംസ് (തീക്കോയി), എ.ഡി.എം. ജിനു പുന്നൂസ്, കാഞ്ഞിരപ്പള്ളി തഹസിൽദാർ സണ്ണി ജോർജ്ജ്, രാഷ്ട്രീയ പാർട്ടി പ്രതിനിധികളായ സി.കെ. ശശിധരൻ, കെ. രാജേഷ് എന്നിവർ പരിപാടിയിൽ പങ്കെടുത്തു.
കാഞ്ഞിരപ്പള്ളി താലൂക്കിൽ പൂർണമായും വീടു നഷ്ടപ്പെട്ട 47 പേർക്കുള്ള ധനസഹായമാണ് മന്ത്രി വിതരണം ചെയ്തത്.