റിജോ വാളാന്തറ കേരളാ കോൺഗ്രസ് (എം) കാഞ്ഞിരപ്പള്ളി മണ്ഡലം പ്രസിഡന്റ്

കാഞ്ഞിരപ്പള്ളി : കാഞ്ഞിരപ്പള്ളി ഗ്രാമപഞ്ചായത്തംഗവും, മുൻ പഞ്ചായത്ത് വൈസ് പ്രസിഡന്റും, കേരള കോൺഗ്രസ് എമ്മിന്റെ മണ്ഡലം വർക്കിങ്ങ് പ്രസിഡന്റുമായ റിജോ വാളാന്തറയെ കേരളാ കോൺഗ്രസ് (എം) കാഞ്ഞിരപ്പള്ളി മണ്ഡലം പ്രസിഡന്റായി ഐക്യകണ്ഠമായി തിരഞ്ഞെടുത്തു. മുൻ ഗ്രാമപഞ്ചായത്തംഗമായ ജോഷി അഞ്ചനാടനുമായി വാശിയേറിയ മത്സരത്തിന് കളമൊരുങ്ങിയിരുന്നെങ്കിലും, സമവായത്തിലൂടെ മത്സരം ഒഴിവാക്കുകയായിരുന്നു.

കേരള കോൺഗ്രസ് യുവജന വിഭാഗമായ യൂത്ത് ഫ്രണ്ട് എം സംസ്ഥാന വൈസ് പ്രസിഡന്റ് ആയിരുന്ന റിജോ നിലവിൽ കേരള കോൺഗ്രസ് എമ്മിന്റെ മണ്ഡലം വർക്കിങ്ങ് പ്രസിഡന്റുമാണ്. ഇടക്കാലത്ത് പാർട്ടിയിൽ നിന്നും പിന്മാറി, പി. സി. ജോർജിനൊപ്പം ജനപക്ഷം പാർട്ടിയിൽ മികച്ച പ്രവർത്തനം നടത്തിയിരുന്ന റിജോ, തിരികെ കേരള കോൺഗ്രസിൽ എത്തിയപ്പോൾ നടത്തിയ സംഘടനാ പ്രവർത്തനങ്ങളും ഏറെ മികച്ചതായിരുന്നു. പാർട്ടിയുടെ മെമ്പർഷിപ് ക്യാമ്പയ്‌നിൽ സജീവമായി പങ്കെടുത്ത് നിരവധിപേരെ പാർട്ടി അംഗങ്ങൾ ആക്കിയതോടെ, റിജോ പാർട്ടിയിൽ മികച്ച സ്ഥാനമുറപ്പിച്ചു. മെമ്പറായി പ്രവർത്തിച്ച പതിനെട്ടാം വാർഡിലും , നിലവിൽ മെമ്പറായ പത്തൊൻപതാം വാർഡിലും, റിജോ നടത്തിയ വികസന പ്രവർത്തനങ്ങൾ ഏറെ ശ്ലഘനീയങ്ങളാണ്.

ഡോ. എൻ ജയരാജിന്റെ നിയമസഭാ തിരഞ്ഞെടുപ്പ് വേളയിൽ, കാഞ്ഞിരപ്പള്ളി മേഖലയിൽ പ്രചാരണത്തിന് ചുക്കാൻ പിടിച്ചത് റിജോയായിരുന്നു. മികച്ച ഭൂപരിപക്ഷത്തോടെ ഡോ എൻ ജയരാജ് വീണ്ടും അധികാരത്തിൽ വരികയും, ഗവൺമെന്റ് ചീഫ് വിപ്പ് ആവുകയും ചെയ്തതോടെ, കൂടുതൽ ദൃഢമായ ആ ബന്ധം റിജോ വാളാന്തറയുടെ രാഷ്ട്രീയ വളർച്ചയ്ക്ക് ഏറെ സഹായകരമായി.