അകക്കണ്ണിന്‍റെ വെളിച്ചത്തില്‍ പരീക്ഷ എഴുതാനൊരുങ്ങി വിദ്യാര്‍ഥികള്‍
കാഞ്ഞിരപ്പള്ളി: അകക്കണ്ണിന്‍റെ വെളിച്ചത്തില്‍ പരീക്ഷയെഴുതാനൊരുങ്ങി കാളകെട്ടി അസീസി അന്ധവിദ്യാലയത്തിലെ വിദ്യാര്‍ഥികള്‍. തലയോലപ്പറന്പ് ഉമാങ്കുന്ന് കുഴിയംതടത്തിൽ കെ.എ. അനന്തകൃഷ്ണൻ, കണ്ണൂർ ഉളിക്കല്ല് കോനാൻ ജസ്റ്റിൻ ജോസഫ്, റാന്നി അത്തിക്കയം അറക്കമണ്‍തെക്കേൽ അരുണ്‍ സുരേഷ്, ഇടുക്കി പീരുമേട് കുളംകണ്ടത്തിൽ പ്രിയ മാത്യു, ചിറക്കടവ് സെന്‍റർ തെക്കേത്തുകവല അഞ്ജലി വീട്ടിൽ ബി. ആകാശ് എന്നിവരാണ് അസീസി സ്‌കൂളില്‍ നിന്ന് ഈ വര്‍ഷം എസ്എസ്എല്‍സി എഴുതുന്നത്.
കാളകെട്ടി അച്ചാമ്മ മെമ്മോറിയല്‍ ഹയര്‍ സെക്കന്‍ഡറി സ്‌കൂളില്‍ സ്ക്രൈബിന്‍റെ സഹായത്തോടെയാണ് ഇവർ പരീക്ഷയെഴുതുന്നത്. ഒന്നു മുതല്‍ ഏഴു വരെ ക്ലാസുകളിൽ അസീസി അന്ധവിദ്യാലയത്തിലും ഹൈസ്‌കൂള്‍ അച്ചാമ്മ മെമ്മോറിയല്‍ സ്‌കൂളിലുമാണ് ഇവർ പഠിച്ചത്. ഇവരിൽ നാലു പേരും ഇവിടെ താമസിച്ചാണ് പഠിക്കുന്നത്. കലാമത്സരങ്ങളിലും ഇവര്‍ കഴിവ് തെളിയിച്ചിട്ടുണ്ട്. സ്‌പെഷല്‍ സ്‌കൂള്‍ സംസ്ഥാന കലോത്സവത്തില്‍ പങ്കെടുത്ത് സമ്മാനങ്ങളും കരസ്ഥമാക്കിയിട്ടുണ്ട്.