” പൂഞ്ഞാർ നിയോജക മണ്ഡലത്തിലെ വനാതിർത്തി മേഖലകളിൽ പൂർണ്ണമായും സുരക്ഷിതത്വവേലികൾ ഒരുക്കും..” : അഡ്വ. സെബാസ്റ്റ്യൻ കുളത്തുങ്കൽ എം എൽ എ

എരുമേലി : പൂഞ്ഞാർ നിയോജകമണ്ഡലത്തിന്റെ വിവിധ പ്രദേശങ്ങളിൽ വന്യമൃഗ ശല്യം രൂക്ഷമാകുന്ന സാഹചര്യത്തിൽ നിയോജകമണ്ഡല പരിധിയിൽ ജനവാസ മേഖലകളുമായി വനാതിർത്തി പങ്കിടുന്ന ഏകദേശം 30 കിലോമീറ്റർ ദൂരം പൂർണമായും വിവിധ സുരക്ഷിതത്വ ക്രമീകരണങ്ങൾ ഒരുക്കി വന്യമൃഗങ്ങൾ ജനവാസ മേഖലകളിലേക്ക് പ്രവേശിക്കുന്നത് തടയുന്നതിന് പദ്ധതി ആവിഷ്കരിക്കുകയാണ് പൂഞ്ഞാർ എം എൽ എ അഡ്വ. സെബാസ്റ്റ്യൻ കുളത്തുങ്കൽ പറഞ്ഞു.

കഴിഞ്ഞ ദിവസം രാത്രിയിൽ കാട്ടാനകളുടെ ആനകളുടെ ആക്രമണം നേരിടേണ്ടി വന്ന എരുമേലി പഞ്ചായത്തിലെ തുമരംപാറ വാർഡിൽ കൊപ്പത്ത് വനാതിർത്തിക്ക് അടുത്ത് താമസിക്കുന്ന ആനക്കല്ലിൽ സോഫിയയുടെ വീട് സന്ദർശിക്കവയെന്ന് എം എൽ എ സുരക്ഷാ പദ്ധതികളെപ്പറ്റി പറഞ്ഞത് .

നിലവിൽ വനാതിർത്തികളിൽ 6 കിലോമീറ്റർ ദൂരത്തിൽ മാത്രമാണ് സൗരവേലി നിലവിലുള്ളത്. ഇതിൽ മൂന്നര കിലോമീറ്റർ ദൂരത്തിൽ സമീപനാളിൽ നിർമ്മിച്ചത് ഒഴികെ മിക്ക സ്ഥലങ്ങളിലും സൗരവേലികൾ തകരാറിലുമാണ്. ഇതുമൂലമാണ് വന്യമൃഗങ്ങൾ കൂടുതലായി നാട്ടിൽ പ്രവേശിക്കുകയും ജീവനും, സ്വത്തിനും നാശം വരുത്തുകയും ചെയ്യുന്നത്. ഈ വിഷയം പരിഹരിക്കുന്നതിന് ശക്തമായ ഇടപെടൽ നടത്തും. വനാതിർത്തികളിൽ പൂർണമായും സുരക്ഷിതത്വ ക്രമീകരണങ്ങൾ ഒരുക്കുന്നതിനെക്കുറിച്ച് വിശദമായ ചർച്ചകൾ നടത്തുന്നതിനും, തീരുമാനങ്ങൾ എടുത്ത് പദ്ധതി തയ്യാറാക്കുന്നതിനും വേണ്ടി ജൂൺ 24-)o തീയതി ശനിയാഴ്ച ഉച്ചകഴിഞ്ഞ് രണ്ടുമണിക്ക് മുണ്ടക്കയം പഞ്ചായത്ത് കോൺഫറൻസ് ഹാളിൽ വച്ച് ജനപ്രതിനിധികളുടെയും , വനം വകുപ്പ് ഉദ്യോഗസ്ഥരുടെയും സംയുക്ത യോഗം ഒളിച്ചു ചേർത്തിട്ടുണ്ട്.

വനം വകുപ്പ് അധികൃതരെ കൂടാതെ ജനവാസ മേഖലകളുമായി വനാതിർത്തി പങ്കിടുന്ന പ്രദേശങ്ങളിലെ ത്രിതല പഞ്ചായത്ത് ജനപ്രതിനിധികളും, വിവിധ സംഘടനാ പ്രതിനിധികളും യോഗത്തിൽ പങ്കെടുക്കുന്നതാണ്. വന്യമൃഗശല്യം തടയുന്നതുമായി ബന്ധപ്പെട്ട് നടക്കുന്ന വിശദമായ ചർച്ചകളുടെയും, നിർദ്ദേശങ്ങളുടെയും അടിസ്ഥാനത്തിൽ വനാതിർത്തികളിൽ പൂർണമായും സുരക്ഷിതത്വ ക്രമീകരണങ്ങൾ ഒരുക്കുന്നതിനുള്ള വിശദമായ കർമ്മപദ്ധതിയും തയ്യാറാക്കും. ഇതിനായി വനംവകുപ്പ് ഉദ്യോഗസ്ഥരെ ചുമതലപ്പെടുത്തും. സൗരവേലി, ഹാങ്ങിങ് ഫെൻസ്, ജൈവവേലി, കിടങ്ങുകൾ, തുടങ്ങി എല്ലാവിധ പ്രതിരോധ സംവിധാനങ്ങളും പരിഗണിക്കുന്നതാണ്. ഇതിനായി വനം വകുപ്പ് ഫണ്ട്, ത്രിതല പഞ്ചായത്ത് ഫണ്ട്, എംഎൽഎ ഫണ്ട്, നബാർഡ് പദ്ധതി എന്നീ ഫണ്ട് സ്രോതസ്സുകൾ ഫലപ്രദമായി ഉപയോഗപ്പെടുത്തുന്നതിനും ഉദ്ദേശിക്കുന്നു. പൂഞ്ഞാർ നിയോജകമണ്ഡലത്തിലെ ജനവാസ മേഖലകളിൽ വനാതിർത്തി പങ്കിടുന്ന സ്ഥലങ്ങളിൽ ഒരു വർഷത്തിനുള്ളിൽ സമ്പൂർണ്ണ സുരക്ഷിതത്വ ക്രമീരണങ്ങൾ പൂർത്തീകരിക്കുന്നതിനാണ് ലക്ഷ്യം വയ്ക്കുന്നത്. എംഎൽഎ അറിയിച്ചു .