മെരിറ്റ് ഡേയും യാത്രയയപ്പും
കാഞ്ഞിരപ്പള്ളി: അധ്യാപകൻ ദൈവവുമായി നിരന്തര ബന്ധമുള്ളവരും വിജ്ഞാന മേഖലയിൽ പുതിയ അറിവുകൾ നേടുന്നവരുമായിരിക്കണമെന്ന് കാഞ്ഞിരപ്പള്ളി രൂപതാധ്യക്ഷൻ മാർ ജോസ് പുളിക്കൽ. രൂപത കോർപറേറ്റ് മാനേജ്മെന്റിന്റെ 2020-21 ലെ മെരിറ്റ് ഡേയും വിരമിക്കുന്ന അധ്യാപക, അനധ്യാപകർക്കുള്ള യാത്രയയപ്പും സെന്റ് ഡൊമിനിക്സ് ഹയർ സെക്കൻഡറി സ്കൂളിൽ ഉദ്ഘാടനം ചെയ്തു പ്രസംഗിക്കുകയായിരുന്നു മാർ പുളിക്കൽ. കുട്ടികൾ വ്യക്തമായ ദർശനമുള്ളവും ദിശാബോധമുള്ളവരുമായി വളരണം. സോഷ്യൽമീഡിയായിലൂടെ കുട്ടികൾക്ക് ലഭിക്കുന്ന അറിവുകളെ നേരായ മാർഗത്തിൽ തിരിച്ചുവിടുകയും ശരിയായ സംസ്കൃതിയിലൂടെ നല്ല തലമുറയെ വാർത്തെടുക്കുന്നവരുമായിരിക്കണം അധ്യാപകർ. സഭയുടെ ദൗത്യമാണ് അധ്യാപകർ നിർവഹിക്കുന്നതെന്നും മാർ ജോസ് പുളിക്കൽ കൂട്ടിച്ചേർത്തു.
മികച്ച നേട്ടം കൈവരിച്ച കുട്ടികൾക്കും സ്കൂളുകൾക്കും സമ്മാനങ്ങളും ട്രോഫികളും നൽകി. രൂപത സിഞ്ചെല്ലൂസ് ഫാ. ബോബി അലക്സ് മണ്ണംപ്ലാക്കൽ യോഗത്തിൽ അധ്യക്ഷതവഹിച്ചു. കത്തീഡ്രൽ വികാരി ആർച്ച് പ്രീസ്റ്റ് ഫാ. വർഗീസ് പരിന്തിരിക്കൽ, ഫാ. സഖറിയാസ് ഇല്ലിക്കമുറി എന്നിവർ പ്രസംഗിച്ചു. കോർപറേറ്റ് മാനേജർ ഫാ. ഡോമിനിക് ആയിലൂപ്പറന്പിൽ സ്വാഗതവും പ്രിൻസിപ്പൽ ഡോ. ബിനോയ് എം. ജേക്കബ് നന്ദിയും പറഞ്ഞു.
