കാഞ്ഞിരപ്പള്ളിയുടെ അഭിമാനം അലിസ്റ്റർ അലക്സ്; “ജോജി”യിലെ തകർപ്പൻ അഭിനയത്തിന് അഭിനന്ദന പ്രവാഹം..

കാഞ്ഞിരപ്പള്ളി : കഴിഞ്ഞ ദിവസം ആമസോൺ പ്രൈമിൽ റിലീസ് ചെയ്ത ദിലീഷ് പോത്തൻ-ഫഹദ് ഫാസിലിന്റെ ജോജിയെന്ന സൂപ്പർഹിറ്റ് സിനിമയിൽ തകർപ്പൻ അഭിനയം കാഴ്ചവച്ച കാഞ്ഞിരപ്പള്ളിയിലെ മണ്ണംപ്ലാക്കൽ അലക്സ് ചാണ്ടിയുടേയും ജിജിയുടേയും മകനായ അലിസ്റ്റർ അലക്സ്സിന് അഭിനന്ദനപ്രവാഹം. കാഞ്ഞിരപ്പള്ളി ആനക്കല്ല് സെന്റ് ആന്റണീസ് സ്കൂളിൽ പ്ലസ് ടു വിദ്യാർത്ഥിയാണ് അലിസ്റ്റർ അലക്സ്. ഒൻപതാം ക്ലാസ് വരെ ഷാർജയിൽ ഔവർ ഓൺ ഇന്ത്യൻ സ്കൂളിൽ പഠനം നടത്തിയ ശേഷമാണ് കാഞ്ഞിരപ്പള്ളിയിലേക്കു വന്നത് .

സിനിമയിൽ മുൻപ് അഭിനയിച്ച് പരിചയമില്ലാത്ത അലിസ്റ്റർ ഫഹദ് ഫാസിലിന്റെ ജോജിയെന്ന സിനിമക്ക് വേണ്ടിയുള്ള കാസ്റ്റിംഗ് കോൾ പരസ്യത്തിന് വീട്ടിൽ അറിയാതെയാണ് അപേക്ഷിച്ചത്. അലിസ്റ്ററിന്റെ പെർഫോമൻസ് ഇഷ്ടമായ പോത്തനും ടീമും ജോജിയിലെ “പോപ്പി” എന്ന കഥാപാത്രമായി അലിസ്റ്ററിനെ തിരഞ്ഞെടുത്തു. വലിയ തരത്തിലുള്ള ഒരു പരിശീലനമൊന്നും നൽകാതെ തന്നെ മികച്ച പെർഫോമൻസ് പുറത്തെടുക്കാൻ അലിസ്റ്ററിനു കഴിഞ്ഞു എന്നാണ് അണിയറപ്രവർത്തകരുടെ അഭിപ്രായം.

സിനിമ കാണുന്നതിനു പുറമേ സ്വാഭാവികമായും വീഡിയോ ഗെയിംസുമൊക്കെ ഇഷ്ടപ്പെടുന്ന അലിസ്റ്റർ പ്രസംഗ മത്സരങ്ങളിൽ പങ്കെടുക്കാറുണ്ട്. അമ്മയും സഹോദരി അന്നുവിനുമൊപ്പം കാഞ്ഞിരപ്പള്ളിയിൽത്തന്നെ താമസിക്കുന്ന അലിസ്റ്ററിന്റെ പിതാവ് ദുബായിയിൽ ജോലി നോക്കുന്നു.