പ്രതിഷേധധർണ നടത്തി
കാഞ്ഞിരപ്പള്ളി: “വാക്സിൻ നൽകൂ ജീവൻ രക്ഷിക്കൂ’ എന്ന മുദ്രാവാക്യം ഉയർത്തി കാളകെട്ടി പ്രാഥമികാരോഗ്യ കേന്ദ്രത്തിനു മുന്പിൽ ഐഎൻടിയുസി കാഞ്ഞിരപ്പള്ളി മണ്ഡലം കമ്മിറ്റി പ്രതിഷേധ ധർണ നടത്തി. കേന്ദ്ര സംസ്ഥാന സർക്കാരുകളുടെ വാക്സിൻ വിതരണത്തിലെ അനാസ്ഥയും രാഷ്ട്രീയ ഇടപെടലുകളും അവസാനിപ്പിക്കണമെന്നും പാവപ്പെട്ടവർക്കും തൊഴിലാളികൾക്കും വാക്സിൻ സൗജന്യമായി വിതരണം ചെയ്യുന്നതിന് അടിയന്തര നടപടികൾ ഉണ്ടാകണമെന്നും ആവശ്യപ്പെട്ടാണ് ധർണ നടത്തിയത്.
കേന്ദ്ര സംസ്ഥാന സർക്കാരുകളുടെ കോവിഡ് പ്രതിരോധത്തിലെ നിരുത്തരവാദപരമായ നടപടികളും തെറ്റായ വാക്സിൻ നയവുമാണ് വാക്സിൻ വിതരണം തകിടം മറിച്ചതെന്നും തൊഴിലാളികൾക്ക് തൊഴിൽ സ്ഥലങ്ങളിൽ പോയി തൊഴിൽ ചെയ്യാൻ പറ്റാത്ത സാഹചര്യം ഉണ്ടാക്കിയതെന്നും പ്രതിഷേധ ധർണ ഉദ്ഘാടനം ചെയ്ത ഡിസിസി ജനറൽ സെക്രട്ടറി റോണി കെ. ബേബി പറഞ്ഞു. മണ്ഡലം പ്രസിഡന്റ് റസിലി തേനമ്മാക്കൽ അധ്യക്ഷത വഹിച്ചു. ഐഎൻടിയുസി ജില്ലാ ട്രഷറർ ജി. സുനിൽ കുമാർ മുഖ്യ പ്രഭാഷണം നടത്തി. നിബു ഷൗക്കത്ത്, പി.പി.എ. സലാം പാറയ്ക്കൽ, ഇക്ബാൽ തൈപ്പറമ്പിൽ എന്നിവർ പ്രസംഗിച്ചു.
പൊൻകുന്നം: ഐഎൻടിയുസി ജില്ലാ കമ്മിറ്റിയുടെ ആഹ്വാന പ്രകാരം ചിറക്കടവ് മണ്ഡലം കമ്മിറ്റിയുടെ നേതൃത്വത്തിൽ പൊൻകുന്നം ടൗണിൽ വാക്സിൻ നൽകൂ ജീവൻ രക്ഷിക്കൂ എന്ന ആവശ്യം ഉന്നയിച്ച് ധർണ നടത്തി. ഐഎൻടിയുസി ജില്ലാ സെക്രട്ടറി മാത്യു പുന്നത്താനം ധർണ ഉദ്ഘാടനം ചെയ്തു. ജയകുമാർ കുറിഞ്ഞിയിൽ അധ്യക്ഷത വഹിച്ചു.
