സ്കൂളിന് ലാബൊരുക്കാൻ ബിരിയാണി ചലഞ്ച്
പെരുവന്താനം: മാതൃവിദ്യാലയത്തിൽ ആധുനിക സയൻസ് ലാബ് നിർമിക്കാനുള്ള ധനസമാഹരണത്തിന് ബിരിയാണി ചലഞ്ചുമായി പൂർവവിദ്യാർഥി സംഘടന.
പെരുവന്താനം സെന്റ് ജോസഫ്സ് ഹൈസ്കൂളിലെ പൂർവവിദ്യാർഥി സംഘടനയായ പാഠചക്രമാണ്‌ ബിരിയാണി ചലഞ്ച് സംഘടിപ്പിക്കുന്നത്.
25 ലക്ഷം രൂപ ചെലവഴിച്ചാണ് മെൺലോ പാർക്ക് എന്നപേരിൽ ലാബ് നിർമിക്കുക. ഭൗമദിനമായ വെള്ളിയാഴ്ച രാവിലെ 9.30-ന് പെരുവന്താനം ജങ്‌ഷനിൽ ജനപ്രതിനിധികൾ, പൗരപ്രമുഖർ, വ്യാപാരികൾ, കുടുംബശ്രീ പ്രവർത്തകർ, പൂർവവിദ്യാർഥികൾ, നിലവിലെ വിദ്യാർഥികൾ, അധ്യാപകർ, പൂർവഅധ്യാപകർ, പി.ടി.എ. ഭാരവാഹികൾ എന്നിവരെ പങ്കെടുപ്പിച്ച് പ്രചാരണം നടത്തും.
അഞ്ച് അടി ഉയരത്തിലും 50 അടി നീളത്തിലും തുണിയിൽ നിർമിച്ച വലിയബാനറിൽ ഭൗമദിനവുമായി ബന്ധപ്പെട്ട സന്ദേശങ്ങളും ആശയങ്ങളും നിർദേശങ്ങളും പങ്കെടുക്കുന്നവർ എഴുതും.
സ്കൂളിലെ പൂർവവിദ്യാർഥിയും സിനിമാ താരവുമായ സിയാദ് ഉദ്ഘാടനം ചെയ്യും.
പാഠചക്രം ഭാരവാഹികളായ റെജിമോൻ ചെറിയാൻ, സെബാസ്റ്റ്യൻ മുകളേൽ, സി.എസ്.നാസർ, സി.ആർ.സോമൻ, സ്കൂൾ മാനേജർ ഫാ.തോമസ് നെല്ലൂർ കാലായിൽപറമ്പിൽ, പ്രഥമാധ്യാപിക ഉഷസ് മേരി ജോൺ, പി.ടി.എ. പ്രസിഡൻറ് സാജു പൗവത് എന്നിവർ നേതൃത്വം നൽകും. 24-ന് ആദ്യഘട്ടമായി ബിരിയാണി വിൽപ്പന നടത്തും.