മദ്യലഹരിയിൽ ബസിന്‍റെ ചില്ല് എറിഞ്ഞുതകർത്ത മധ്യവയസ്കൻ പിടിയിൽ
മുണ്ടക്കയം ഈസ്റ്റ്: മദ്യലഹരിയിൽ ബസിന്‍റെ ചില്ല് എറിഞ്ഞു തകർത്ത മധ്യവയസ്കൻ പിടിയിൽ. കൊണ്ടൂര്‍, പൂവത്തോട്, പുതുപ്പറമ്പില്‍ മാത്യു ജോസഫിനെയാണ് (50) പെരുവന്താനം സിഐ എ. അരുണ്‍, എസ്ഐ ജേക്കബ് എന്നിവര്‍ ചേര്‍ന്നു അറസ്റ്റ് ചെയ്തത്.
ഏലപ്പാറയില്‍നിന്ന് ബസില്‍ കയറിയ ഇയാള്‍ മദ്യലഹരിയില്‍ ജീവനക്കാരോടും യാത്രക്കാരോടും അസഭ്യം പറയുകയും ബഹളമുണ്ടാക്കുകയുമായിരുന്നു. കൊടികുത്തിക്ക് ടിക്കറ്റെടുത്ത ഇയാളുടെ ശല്യം സഹിക്കവയ്യാതെ കടുവാപ്പാറയെത്തിയതോടെ ബസില്‍ നിന്നു ജീവനക്കാര്‍ ഇറക്കിവിടുകയായിരുന്നു.
ഇതോടെ ക്ഷുഭിതനായ ഇയാള്‍ കല്ലെടുത്ത് ബസിന്‍റെ ചില്ല് എറിഞ്ഞു തകര്‍ക്കുകയായിരുന്നു. പിന്നീട് പെരുവന്താനം പോലീസെത്തി അറസ്റ്റ് ചെയ്തു. പീരുമേട് കോടതിയിൽ ഹാജരാക്കിയ ഇയാളെ 14 ദിവസത്തേക്ക് റിമാന്‍ഡ് ചെയ്തു.